孫佳君愛直接 大廚咀不停
「美魔女」孫佳君雖已是兩子之母，但依然保養得宜，「索」味甚濃！多年來對拍拖、結婚等私事，不願多談的她，近年有着180度轉變，除大方承認跟法籍大廚正展開「美味情緣」外，還自爆變了「接吻魚」，男友跟她每次見面都咀到暈，又甜絲絲指男友很疼錫她，經常為她炮製愛的驚喜，有了愛情的女人，難怪笑得分外甜！
孫佳君出道至今，都予人一種說不出的「騷」味，但她多年來對自己的感情私事，都採取密封政策，不願多談，不過，世事無絕對，近年各方面都改變了不少的她，正與法籍三星米芝蓮大廚Olivier蜜運中，面對發展了兩個多月的新戀情，孫佳君沒有半點隱瞞，向記者直認：「我依家係拍緊拖，好開心！」
難忘行山6粒鐘
談到男友，孫佳君笑逐顏開，大讚是一個浪漫熱情的人，喜歡為她炮製驚喜，她說：「記得有一次佢帶我去行山，佢選擇嘅路線，可以話係我呢生人行過最難忘同最辛苦嘅一次，因為條路好斜同埋有好多大石，行起上嚟，難度相當之高，行足六小時，真係唔係人人可以行到，最搞笑係，呢六個鐘頭山路，佢只帶咗一支好細嘅水，又唔敢講畀我知，自己忍住口渴畀晒支水我飲，我知道時都幾感動，好彩喺山上面遇到一班人畀咗兩支水我哋。」
一餐飯錫五十啖
孫佳君坦言跟男友很多方面都夾，尤其對生活的熱誠及對愛的直接，不理何時何地，都喜歡用錫錫來表達愛意，孫君佳說：「我哋食一餐飯，閒閒地都要咀五十幾啖，單單頭盤都三十啖，都唔明點解，哈哈！歐洲男士好有風度亦好直接、熱情，開唔開心都會直接表達，同我好啱，咁生活先有不一樣嘅感受。」
場地：Harlan's
文：影視組