香香鍾意食嘢張振朗嗒糖
藝人岑麗香、張振朗、羅孝勇及何佩珉，前晚到屯門出席《V city跨年派對》，穿上搶眼紅衣迎新年的香香，晒半鹹淡廣東話，自稱係「鍾意食嘢嘅嘢」，可愛得令同場的張振朗激讚，又謂新一年恨與香香合作。
岑麗香、張振朗、羅孝勇及何佩珉前晚出席《V city跨年派對》，香香穿上搶眼紅衣look晒腿示人。問到她2015年可想找個男友，她用半鹹淡廣東話說：「隨緣啦，我最近拍緊飲食節目《明星愛廚房》，我係鍾意食嘢嘅嘢，（你想講你係鍾意食嘢嘅人？）係啦，新一年我要學好啲中文啦，嘻嘻！雖然做藝人做飲食同旅遊節目係好有福氣，但都要做番好多運動平衡番，（唔覺你肥咗！）梗係啦，我依家每日都要做半個鐘運動o架！」
愛情隨緣
模仿張智霖而人氣急升的張振朗，也被香香迷住，他說：「香香真係好靚，好似個公主咁！我好希望新一年可以同佢合作。新年願望亦都想觀眾可以認識我張振朗多啲，我預備咗好多嘢，去咗學唱歌、跳舞，等緊show畀觀眾睇。（愛情有咩期望？）隨緣，我事業先啱啱開始，努力工作先！」自爆家住屯門的他，獲親友到場力撐。
「巨聲」成員羅孝勇說：「今年我終於可以出碟，好開心，籌備咗5年，稍後又會拍微電影，暫時未知對手。（介意同緋聞舊愛林欣彤合作？）唔介意，我哋係朋友。（日後合作，要同現任女友備案？）唔使，我哋巨聲好多時都唱K，仲group chat添啦！」問到他女友有否到場撐他，他則大賣關子。
參加無綫《功夫新星》出身的何佩珉則說：「2015年我希望拍武打片，又想減走包包面，有高層話我要減吓肥。（打botox瘦面？）唔會，想用啲自然嘅方法減。」
文：影視組