鍾嘉欣享受失控動殺機
來港發展十年的鍾嘉欣最恨到尖沙咀湊熱鬧睇聖誕燈飾，可惜礙於明星身份一直未能如願，嘉欣笑謂可能要扮聖誕老人才不會被認出。事業方面，嘉欣在電視劇《飛虎II》演的角色情緒較失控，她說過足戲癮，並希望日後可演有型殺手！
在加拿大長大，過慣白色聖誕的鍾嘉欣十分懷念溫哥華的聖誕氣氛，她說：「嚟咗香港10年，都未去過尖沙咀睇燈飾，好恨去睇，但咁多人，要去睇有難度，或者要扮聖誕老人先唔會被認出。」
曾收二手禮物
嘉欣小時候屋企環境不好，父母要到志願機構領取二手聖誕禮物，到聖誕一起床走出廳，就會見到一個黑色大垃圾袋，她和哥哥、姐姐就知道是父母送的禮物，雖然裏面是二手玩具、公仔、火車，但幾兄妹已很開心。嘉欣說：「好難忘父母用垃圾袋包裝嘅禮物，呢啲都係佢哋心意，依家我包聖誕禮物都會用報紙、舊花紙，環保啲，唔好浪費。」
事業方面，演慣乖乖女的嘉欣在無綫劇《飛虎II》有突破演出，演患躁鬱症的警察，她說：「角色同以前唔同，好恐怖、好失控，事前做咗好多功課，上網睇真人真事資料，睇到自己都好似有躁鬱症咁，拍嗰時都有啲病徵，躁鬱咗三個月應該都嚇親人。」
「想挑戰自己」
嘉欣覺得角色令她過足戲癮，好似發掘了另一個鍾嘉欣，她說：「好想挑戰自己，做人應該挑戰自己唔敢做嘅嘢，以前太穩陣，希望拍《飛虎II》後，監製會畀我試新嘢，刺激吓啲觀眾，我夢想自己可以着皮衫皮褲，做個有型殺手。」
採訪：影視組
攝影：劉智源