單拖阿佘殘爆 拒提嘉穎

阿佘、三哥、江美儀、陳敏之、高海寧、梁烈唯等無綫劇集《使徒行者》演員，昨晚為慶祝劇集在「萬千星輝頒獎典禮2014」獎項大豐收，食慶功宴兼開聖誕Party，眾人響應三哥呼籲，攜眷或一家大細出席慶佳節，三哥帶同三嫂（戚美珍）及乖女苗彤現身，苗彤比前更索更省鏡，令人眼前一亮。黃長興抱着女兒出席，眾人排隊撩她玩，江美儀則與男友吳君祥及愛犬「一家三口」亮相，獨「視后」阿佘孤單一人到場，更以素顏眼鏡look病樣示人。

得獎後人人多工作

阿佘佳節無伴，更抱病在身，我見猶憐，她說：「平安夜晚唔舒服，冇出街留喺屋企，冇同Toby（梁靖琪）開party。（今晚你請客？）冇預budget，任玩！（傳視帝郭晉安用咗6位數請食飯？）請埋我啦！我都冇計（攞視后後）食咗幾餐，不過大家都對個劇嘅成績滿意。（傳鄭嘉穎有個上海女友？）唔講，冇回應，（點解唔講？）唔回應啦！」雖拒絕回應，但阿佘全程笑笑口。

江美儀與男友吳君祥「一家三口」出席。

三哥帶酒到場與眾同樂。

三哥拎了兩箱酒到場，但開香檳時不慎噴到自己雙眼，他說：「我梗係滿意個劇，攞埋『最佳劇集』喎！今晚梗係阿佘請，佢拎咁多獎！我聽日要飛外地，唔玩得夜。（個劇拎獎令你多咗工作？）係，幫補吓啦！阿佘仲多，最多係佢！（會再拍劇？）TVB搵我先得，都未搵。我叫咗大家今晚帶埋屋企人出席，三嫂、苗彤都會到，每個人都要預備禮物交換，冇預備就拎300蚊出嚟抽！（提個女聖誕外出去玩要小心？）唔會，佢都咁大個，邊顧到咁多？」

江美儀自誇腳頭旺

紅衣女郎江美儀，為愛犬穿上聖誕老人裝，與男友吳君祥仿似一家三口，美儀說：「我腳頭都幾旺，入TVB後5個劇4個有獎，男友話我冧莊攞女配角就送架車畀我，唔緊要啦，出年再做好啲！」吳君祥被問為甚麼不穿紅色襯女友？他說：「我着咗紅底，使唔使拎出嚟？」

文：影視組