阿嬌抓折頭 楊生：靚女有優待！
小富婆鍾欣潼（阿嬌）昨日率先去到英皇集團豪宅「維港峰」Upton睇樓，更氹掂老闆楊受成，成功抓折，考慮購入新單位。經理人霍汶希（Mani）則透露明年將炮製神秘節目，賀Twins入行15周年，實行玩謝一對好姊妹。
英皇藝人阿嬌及經理人Mani昨日現身英皇集團（國際）有限公司豪宅項目「維港峰」Upton率先睇樓，楊受成夫婦亦有到場，歌手洪杰則任活動司儀。阿嬌在開放式廚房內用生果裝飾蛋糕，Mani則用朱古力寫了「維港峰」賀公司新樓盤開售。阿嬌揚言喜歡下廚，在旁的Mani笑言：「咁整番套《十二道嬌味》囉！」之後阿嬌問老闆楊生買樓可有折扣？楊生笑言：「梗係有！靚女有優待！」她笑言若真的有折扣會考慮購入「維港峰」，但正考慮搬入早前購入的「維壹」單位。
學烹飪箍老公
問阿嬌有多少物業時，她說：「我依家住緊嗰度，同埋維壹，其他我唔知喇。（內地買樓？）其實買樓之前我想喺北京買，因為好平，但依家貴好多，或者問吓老闆上面有冇樓賣啦！」
聖誕節將至，阿嬌表示大多數會留港與好姊妹蔡卓妍（阿Sa）度過：「約阿Sa啦！（佢唔使拍拖？）佢要陪我就應該得閒。」提到阿Sa最新的性感電影海報時，她即大讚：「好sexy但唔暴露。」Mani則稱：「尺度真係好大，但又好靚喎，阿Sa又影得唔色情，一開始唔OK o架，最後都批咗。」阿嬌又笑言積極學烹飪，更會拜阿Sa司機的太太為師，準備做一個賢妻良母：「要箍住第時個老公個胃。（搵到老公未？）未，但係要打定底。」
籌備Twins節目
另外，Mani透露正籌備一個關於Twins的節目，因為明年是Twins出道15周年，但問到節目題材時，她則大賣關子：「好神秘，我唔想畀人抄橋，但今次佢哋會辛苦，等佢哋經歷吓姊妹情，試吓唔同嘅嘢。」
文：音樂組