甄子丹獎詩詩甜過白色聖誕
甄子丹多年來財政大權都交由老婆汪詩詩打理，而詩詩亦不負「丹」望，2011年成功擸得筍盤工廈，短短三年物業急升「double」，令子丹身家進帳千萬，有此幸運賢妻，子丹當然錫晒，就算工作忙到爆都陪老婆、仔女聖誕出埠旅行，隨時有機會歡度白色佳節！而詩詩則謙稱子丹事事成功，不單止她一人的功勞，雙方家人、員工的支持同樣重要！
甄子丹太太汪詩詩素來持家有道，投資眼光獨到，昨日《好報》獨家披露詩詩於2011年首次投資黃竹坑工廈，因扑中港鐵盤，工廈附近將建港鐵，結果樓價直線上升，三年間物業升值千五萬，投資眼光甚為精準，十分旺夫！
詩詩入得廚房出得廳堂，且投資有道，子丹當然錫到燶，更不時有獎勵，雖然子丹正積極忙於籌備明年開拍的《葉問3》及荷里活電影《Noodle Man》，經常游走中港、美國多地，但他依然決定聖誕佳節，抽時間陪太太、仔女到羅省旅行，一家人實行共享天倫，隨時有機會過白色聖誕！
強大團隊撐腰
對於被讚「旺夫」，令子丹事事順利，詩詩謙虛說：「子丹除咗幸運外，亦靠自己嘅天分、勤力努力先有今日嘅成就，當然背後都有支持佢嘅團隊，但唔止我一個人，係雙方家人、公司員工，同埋小朋友都會支持佢！」
黃竹坑工廈大有升值潛力，子丹夫婦不急於放售，詩詩更花了不少心機布置該物業，將4,700呎地方變成甚具心思的「子彈工作室」，工作室內有放置獎項、戲服的「燈影走廊」、百變會議室、私人電影院、酒窖等，樣樣俱全，堪稱「宇宙最強」工作室！
文：影視組