陳嘉桓震住咀大文豪
靠打出身的女星陳嘉桓（Rose）在新片中轉玩內心戲，飾演援交少女的她前晚性感出席首映禮，她透露獻出了多個第一次，包括與廖啟智有床戲及將銀幕初吻獻給周柏豪，Rose直言咀嘴時相當緊張，被柏豪取笑成個人震晒！
周柏豪、陳嘉桓、廖啟智、龔慈恩及黃芷晴等前晚出席電影《販賣．愛》首映，柏豪好友官恩娜（Ella）及連詩雅（Shiga）專誠撐場。首次擔正的Rose身穿低胸裝上陣，她直言為電影獻出多個第一次，包括裸背、床戰智叔、又將螢幕初吻獻給柏豪，她說：「同智叔有肢體交流，錫同埋攬，仲將第一次咀嘴Kiss畀咗柏豪，柏豪拍嗰場時仲笑我做咩咁震！（覺得蝕咗？）唔會，佢咁靚仔！今次有好多內心戲，以往我拍打戲多，今次角色有新鮮感。」她強調劇情反映援交等社會現象，又有學校包場作為通識科教材，因此絕非賣弄色情。問到已一段時間沒拍打戲，是否已「戒打」？她說：「唔係，巧合今年兩部都係劇情片，自己都想拍吓時裝打戲。」
智叔妒忌
至於智叔被問到與Rose的親熱戲時突然咳嗽，被取笑「起痰」，相當搞笑！他笑說：「我算係處男呀！咁多年都冇拍過咁嘅床上戲，有少少尷尬，好似父女咁，但一Roll機就唔記得。」提到Rose將「初吻」獻給柏豪，智叔扮妒忌說：「嘩！佢又有薪酬又有着數！（嬲冇益你？）就算想益我，奈何呢啲機會唔喺我身上呢！」
至於接連有電影上映的柏豪表示想做導演，計劃七年內成事：「依家拍吓MV過吓導演癮先！公司好多人，到時可能請Ella、Shiga參與。（第一部想拍咩？）可能有關籃球，自己比較熟。（搵好友余文樂幫手？）好呀！會問佢意見！」問是否已秘密寫劇本，柏豪即以其花名「大文豪」講笑：「你知我出名寫嘢o架啦！」片中演未婚媽媽的芷晴則表示現實生活絕不接受未婚懷孕：「唔會啦！（爸爸點諗？）梗係冇諗呢啲啦，工作先！（同男友有冇結婚計劃？）冇傾過。」
文：影視組