張敬軒風騷掃衫 喪撩女Sales
剛完成個唱的張敬軒，日前與助手到中環名店掃貨「放血」，獲熱情款待，揀衫時更唔睇價錢，估計埋單數萬元，相當闊綽！付款時，軒仔更口花花撩女店員傾偈，氹到對方相當開心，未知會否令密友關智斌呷醋呢？
歌手張敬軒與關智斌（Kenny）的密友關係傳足多年，早前軒仔為舞台劇演出，Kenny亦有現身後台支持，可見兩人關係多年未變。剛完成三場紅館演唱會的軒仔，日前趁着不用工作，在助手陪同下前往中環名店置裝，加上近日天氣轉涼是時候換季，順度又獎勵一下自己。
店員熱情款待
當日下午4時半，戴眼鏡、身穿白色T恤、牛仔褲的軒仔，乘七人車於該處商場門外落車，甫見記者拍照，軒仔禮貌地笑笑口揮手打招呼，並表示自己去攞衫，態度親切。未幾見他進入了附近名店，店員見到軒仔即熱情款待，期間見他主攻冬季服飾，又睇外套又睇恤衫，近年賺了不少的他，揀衫時見他完全未有看價錢牌，睇啱就即時往試身室試穿。
逗留短短20分鐘，他已有購下不少靚衫，估計埋單閒閒地數萬元，認真豪氣！心情勁靚的軒仔，付款時竟然口花花撩女店員傾偈，女店員被他氹得全程笑咪咪，而自己亦笑到四萬咁口，未知其密友Kenny可會呷醋呢？離開時，多斬獲的軒仔由助手拿着大袋戰利品離開，然後向記者亦友善道別。
文、攝：追蹤組