官恩娜晒求婚巨鑽：原來咁Sweet！

早前面癱停工的官恩娜（Ella）與外籍醫生男友Domingo拍拖六年，昨日凌晨三時Ella在微博公布喜訊：「我要向大家宣布！我們訂婚了！」並上載四張與男友甜蜜蜜的訂婚照。

赴巴黎影靚相

Ella昨日穿上紅噹噹外套，左手無名指戴上閃爆巨型鑽戒，與洪卓立出席UNIQLO新店開幕。Ella自爆已經訂婚一段長時間，但沒透露訂婚日期，也不是太多人知道，她說：「呢個係我哋嘅小秘密。」訂婚後兩人再到巴黎拍照留念，據知這輯訂婚照是7月在巴黎拍攝，估計兩人是年中進行訂婚儀式。

據知Ella的訂婚照是7月在巴黎拍攝。

一臉幸福的Ella昨出席活動時大晒求婚巨鑽。

談到求婚經過，Ella說男友有跪下，過程簡單而感動：「我冇估過佢會求婚，我都呆咗，以為係玩，因為佢成日都情深款款咁玩，直至見到隻戒指先知真。」Ella手上的巨鑽是男友送的訂婚戒，問有幾卡？她笑說：「學Alan（前日結婚的樂隊Mr.主音）話齋唔好咁現實。」

問Ella男友無樓無車，為何她都肯嫁？她說：「冇諗呢啲，只覺得好幸福，活咗35年冇覺得咁開心過，宣布要結婚一刻感覺奇妙，好感恩，要搵個同自己兩情相悅嘅人好難。諗唔到一個男人會向我求婚，第一次感覺到有個人想你做佢老婆，原來咁Sweet！」

生B循序漸進

Ella透露婚期定在明年，但她無意大搞：「一向驚大龍鳳，最緊要Sweet，兩家人整整齊齊。」問她是否準備做媽咪？她笑說：「咁要同公司攞假，你知要成九個月。」她笑言不會未婚產子：「小事糊塗，但人生大事我比較穩陣，鍾意循序漸進，應該唔會有咩意外。」

雖然訂婚了，但Ella沒與男友一齊住，她坦言不愛同居，但朋友覺得婚前應要嘗試同住：「依家訂咗婚，叫佢嚟多啲。」Ella否認隱瞞訂婚，只是想收到在巴黎影的靚相才公告天下。

文：音樂組