亞姐張家瑩被揭 億萬老竇泵水
亞姐出身的張家瑩在亞視打滾七年，據知人工僅得萬零蚊，但最近卻投資千萬在銅鑼灣連開兩間食店，原來背後有個億萬富豪秘密「照起」，不過，照起她的人卻是搞建築生意、身家億億聲的有米老竇，他為怕女兒不夠使用，一年分幾次給予女兒數十萬「零用錢」，所以亞視份糧只當交通費，正是貼錢打工的有錢女。
張家瑩早前自爆亞視三年沒有人工加，但不似其他人走的走，趁機轉行的轉行，每月逗萬零蚊人工，竟有本事短期內在銅鑼灣心臟地帶連開兩間食店，單是開支一個月已逾三十萬，令人嘖嘖稱奇！原來全靠有個身家以億計的父親支持，給予愛女無限量去追尋自己的夢想。
每年塞幾次錢
對於被揭出身富裕家庭，起初她也不願意多提，只謙稱是中產階級而已。她說：「咁我屋企係經營建築生意，係我爸爸叻啫，唔關我事！不過我真係好幸運，屋企人一直好支持我，明知我份人工根本畀唔起家用，爸爸仲擔心我唔夠錢使，每年總會有三、五次塞錢畀我，每次大約都有三、五十萬。」據知其父親為張偉儒，在香港建築界甚有地位，所以她一直有車有樓在手，獨居深井約七百萬元的單位，全部是其父悉心安排。
當問到為何還要在亞視捱足七年時，她坦言完全不後悔，即使現在榮升老闆，仍堅稱會繼續做下去，因在亞視這段日子捱過跌過才真正成長。她認真地說：「以前屋企人好保護我，唔識人情世故，乜嘢都嘈一餐，依家學識待人接物，性格改善咗好多，所以先夠膽開食店做老闆。」她透露亞視中人不是太多知道她的家底，亦甚少向人提及，不想讓人覺得自己玩玩吓。
記者指家瑩現已成為亞視新一姐，她笑言是「死守」成果，從沒想過放棄。自從搞埋生意後更分身不暇，事事親力親為，除了幫手落單外，有時連清潔工作亦攬上身。她說：「有咩所為？以前幫公司返內地拍嘢，遇到情況仲惡劣，試過入住一間賓館毛巾黃甘甘，睇真仲有一條人毛，咁有時出嚟打工，好多事預計唔到。」當說到其員工薪酬個個比她要在亞視高，她說：「係呀！我哋一個廚師都有二、三萬，我要做一個有良心老闆，公司有錢賺一定會加人工。」
唔使門當戶對
雖然身家豐厚，多年單身可要求另一半門當戶對？家瑩滿有信心謂：「唔會，我着重心哋好，我唔會揀人，其實呢個年代嘅男仔仲識得揀啦，我都試過鍾意人，但對方唔鍾意我！（想幾時結婚？）早幾年已經話想結o架喇！或者35歲前，到時閃婚都唔定，生仔到我遇到啱嘅對象即刻生啦！愈快生就愈快收到身！」
Profile
張家瑩
出生：1984年1月6日
身高：1米71
三圍：34D、23、34
文：影視組