祖兒揭過夜關係 軒仔啜爆

軒仔於紅館舉行三場的《LIVE IN PASSION HINS張敬軒演唱會》前晚最後一場，雖然軒仔說話有點聲沙，但完全未有影響唱功，他自爆早上起床失聲，全靠老師幫他開聲。而軒仔又謂做騷好難，令一點點抑鬱重來，幸好有位好朋友每當有困難都找他出去玩，又來看他綵排好Sweet，最感激給他介紹按摩師，而軒仔口中所指正是觀眾席上的容祖兒：「今晚佢一場嚟到，不如上嚟唱隻歌啦！」

出道被嘲冇運行

被殺個措手不及的祖兒給軒仔捉上台，她反問軒仔按摩爽不爽，差點連按摩床都想送埋，軒仔則說出道時被祖兒嘲笑面青唇白冇運行，兩人互爆舊史搞氣氛，祖兒稱當年曾在軒仔家中過夜：「張敬軒係唯一一個男性朋友可以喺佢屋企瞓而冇過火嘅。」即引得哄堂大笑，祖兒愈講愈興奮：「我哋食完你嗰餐泰國菜，你『賓賓』仲一路彈住結他多才多藝。」軒仔怕祖兒講多錯多即阻止說：「叫你上台大家係想聽你唱歌，唔係爆我私人嘢喎！」笑爆全場。之後軒仔提議唱祖兒的《天窗》，還來個「嘴對嘴」熱情一吻，唱畢後軒仔扶着穿高跟鞋落台的祖兒時，仍未收口拋句：「小心呀，你粗身大勢。」

軒仔捉了祖兒上台，一齊合唱《天窗》。

放大圖片

起身失聲險失場

完騷後軒仔講到失聲，他稱：「朝早起身發現冇咗一半聲，可能去得太盡，每場都當最後一場咁唱，好彩睇完醫生食咗消炎藥消咗腫，醫生話太緊張都有關係。」問到祖兒口中「賓賓」是否密友關智斌（Kenny）？軒仔謂：「個斌字好深唔識喎！（頭場Kenny嚟捧場，仲跟住唱《Hurt So Bad》？）嗰首歌咁Hit識唱唔出奇啦。」至於軒仔笑祖兒「粗身大細」莫非有喜？軒仔笑言：「你知我口沒遮攔，雖然我都想佢快啲成家立室，但佢事業為重，我怕佢老咗生唔郁，睇祖兒個樣都係旺丁好生養。」

軒仔扶祖兒落台時，搞笑說她「粗身大勢」。

祖兒與眾人到後台探軒仔班。

至於祖兒昨日亦在instagram上載了「啜嘴相」還寫上「當深水埗Beyonce kiss跑鵝區Madonna」來形容兩人，又指軒仔是百厭仔偷偷練習唱《天窗》，然後把她捉上台，因合唱版只在周柏豪個唱唱過一次，這次即興把她嚇死。

文：音樂組