「肌版都敏俊」陪開餐 王賢誌冧啜
上市公司太子爺王賢誌（Vinci），家族坐擁50億事業王國，去年無懼外間壓力公開性取向，坦誠分享與多年密友的感情生活。前日Vinci出院，密友親往迎接，然後兩人甜蜜地在中環撐枱腳，連啜嘢飲都甜絲絲，令關係曝光。密友高大靚仔，梳齊蔭金秀賢的都敏俊髮型，堪稱「肌版都敏俊」，他對Vinci更是非常細心，令Vinci不時冧笑。
43歲的Vinci，貴為上市公司太子爺，是城中鑽石筍盤，去年親自公開性取向，坦言與當時相處4年的密友愛得癡纏，對方更是其初戀，兩人相戀後火速發展至同居階段，Vinci承認戀愛感覺激烈，一同生活後更能互補長短，令他在多方面都有所改變，並想為至愛舉行盛大婚禮。
要分甘同味
被Vinci稱為C君的密友，一直默默陪在Vinci身邊，但甚少被拍得真面目。前日下午5時半，戴帽的Vinci和C君現身中環行商場，C君真貌終於曝光，身材魁梧高大的他穿上外套亦難掩一身結實肌肉，更梳了個韓星金秀賢在《來自星星的你》飾演的都敏俊髮型，極有「肌版都敏俊」風範。
只見他倆邊行邊傾，步入一間西餐廳後，更無懼外人眼光，挑選當眼位置坐下，然後拿起餐牌有商有量討論點菜，C君更完全讓Vinci話晒事，當食物送上時兩人更互相分享，分甘同味，Vinci啜嘢飲都冧過人！
一頓飯歎足個多小時，「Vin、C」談談笑笑話題不少，未幾他們再拿出手機，互相分享有趣事，場面相當溫馨，Vinci亦不停地冧笑，醫飽肚後由Vinci負責埋單，之後雙雙結伴離開，更默契十足地並肩而行，步往附近的名店選購新裝，C君細心地陪在Vinci身邊，不時細細聲給予意見。
胃膜炎出院
其實，早在「Vin、C」撐枱腳前數小時，Vinci上載了穿病人服在醫院的照片，並留言說：「又禁食又放瀉……終於捱過，沒有大礙，重新開始！」記者致電問候Vinci，他說：「係呀！之前去歐洲狂食嘢，但返嚟後反而瘦咗，我依家得140磅，係廿年來最輕，所以有啲擔心咪去醫院照腸胃，好彩醫生話只係胃膜炎，冇乜事。（你同密友都好sweet喎？）因為要照胃同腸，檢查之前要禁食，餓咗好耐啱啱出院，大家一齊去食嘢囉。」
問到早前曾講過為C君舉辦盛大婚禮一事，目前有何進展？Vinci心情大好地笑笑口說：「冇乜新進展，都係咁，暫時都係咁。」看來感情十分穩定。
文、攝：追蹤組