薛凱琪逼鄭中基講爛Gag

薛凱琪（Fiona）一連兩場《ADIDAS presents TONIGHT FIONA LIVE》紅館演唱會前晚圓滿結束，是夜座位爆滿，陳奕迅、田蕊妮、孫耀威和陳美詩等亦有捧場。除了有方大同繼續做嘉賓，更請來鄭中基做特別嘉賓，兩人鬥講爛Gag，Fiona先說：「我請佢嚟時話我係主角，你唔好好笑過我。佢成日話佢好笑過我，所以我作咗個笑話，我講畀佢聽，佢演繹番出嚟，大家睇吓好唔好笑。」不過鄭中基演繹完「花生醬」冷笑話後全場冇反應，他冇癮地說：「嗱！佢逼我講咋！不如我講一個畀大家聽。有隻小白兔跟住佢，佢以為自己係白雪公主，我話你都傻嘅，你對腳好似蘿蔔咁，白兔梗係跟住你！」終於全場爆笑。