李拾壹校園唱有知音
唱作歌手李拾壹原名李志鋒，他說藝名自細已定：「我中一嗰陣做Drama個角色就係叫李拾壹，中三時改咗個英文名叫Subyub。」曾為林宥嘉作曲的拾壹說：「嗰首歌係2011年作，黃偉文填詞，佢嚟香港開騷都有叫我去睇。」後來他亦有做電影配樂。
他表示今個月將推出首張唱片：「大部分係自己作曲、填詞同編曲。」畢業香港演藝學院的他幕前幕後皆精，拾壹說：「其實我表演係多過寫嘢！唱自己嘅歌係呢幾年嘅事。沖涼仲會唱歌作歌。」拾壹又自言熱愛大學校園騷：「我講嘅嘢佢哋會有反應，我嘅歌佢哋又識聽！」識玩結他、低音結他、鋼琴、Saxophone（色士風）等樂器的拾壹，自爆全部自學，可謂音樂天才！