謝偉倫街頭獻Sing 父子上陣
男新人謝偉倫（Alan）因在街頭獻唱被現時的經理人簽約做歌手，圓歌手夢的Alan日前返回尖沙咀天星碼頭表演，大騷quali邊唱邊彈結他及吹口琴，獲不少途人甚至小朋友上前「獎賞」，更得到電台主持人范振鋒及形象指導張學潤欣賞，讚賞他有潛質。
25歲歌手謝偉倫多年前與好友組成樂隊Ocean，近兩年走訪旺角及尖沙咀街頭獻唱，憑着陳奕迅加已故黃家駒聲線終獲林莉經理人Bolie Wong睇中，簽約為他出碟。日前他與隊友回到天星碼頭表演，吸引電台主持人范振鋒及形象指導張學潤（Nelson）捧場，圍觀者多達半百人，期間獲途人及小朋友「獎賞」，有男途人豪氣給他們一百元，謝父亦有現身打氣，曾夾band的謝父更即場與仔仔jam歌。
偶像係Eason
成功圓歌手夢的Alan說：「等咗呢個機會好耐。（簽約有冇跟父母說？）都有，不過當知道有人簽就冇諗咁多即簽，有機會將自己寫嘅歌畀人聽好開心，之後返到屋企先同父母講。」由於其獻唱的大部分是陳奕迅歌曲，Alan說：「佢係我偶像，佢亦係亞洲最top嘅歌手，影響好多後代。」
有Nelson扮靚
前來欣賞的范振鋒大讚Alan聲線獨特：「真係好似陳奕迅混合黃家駒把聲，有上網睇過佢，都幾有才華。」而Nelson笑指可為對方「執靚啲」，抵死的范振鋒大講有味笑話：「即係執一劑？」搞到Nelson鬼咁尷尬說：「賤格，只係執衫。」
文：音樂組
攝影：嚴偉國