啤梨拍拖年半預告娶女友
單身多年的葉文輝（啤梨）終在粉絲見證下公開戀情，宣布與圈外女友已拍拖近年半，一班媒人粉絲打蛇隨棍上，當眾嗌偶像向「啤梨嫂」求婚，而啤梨放風指早已認定對方為結婚對象，似乎很快再有好消息公布！
DJ葉文輝（啤梨）出道將近二十年，多年來可謂異性絕緣體，只與傅穎及前港姐嘉碧儀傳過煲水緋聞。「男人四十一支花」，現年40歲的啤梨日前終在音樂會上，大膽公開戀情，坦言經朋友介紹認識現任圈外女友，拍拖將近年半，感情穩定。
粉絲準備氣球催婚
在音樂會接近尾聲時，啤梨突然嚴肅地說：「我有個好消息宣布，我有拍拖，我有女朋友啦！對我嚟講係好大突破，佢今日都有嚟到現場。」恰巧粉絲們一早準備了大量「I Love You」氣球給現場觀眾，十分應景，他們亦為偶像牽紅線大叫：「求婚！」
事後接受訪問的啤梨坦言已認定女友為結婚對象：「可能大家都知我年紀都唔細，我拍拖係好認真，我都想有家庭，已經認定咗佢。」他又表示事前女友未知戀情會公告天下，所以個唱結束後便怕醜匆匆離場。
另外，啤梨在音樂會上請來多位來賓，包括：黎美言（Winkie）、胡琳、Soler、Eddie@E02等。期間，Eddie大爆啤梨「掛羊頭，賣狗肉」：「大家唔好睇佢Baby Face、雞仔聲，其實佢都有魔鬼一面，佢有叫我帶佢出去蒲，見識吓。」至於Soler與啤梨合唱時，大孖Julio因唱得太激動，把Mic Stand整爛，米高風跌落地上，相當尷尬。
文：音樂組