鄧紫棋開車拍照 網民插爆

樂壇小巨肺鄧紫棋（G.E.M.）為網民熱論對象，微博粉絲數逾1300萬人！如早前她曾流出疑似艷照，又或疑似在家中開放式廚房中違法以明火煮食，均成網民熱論話題。昨日，G.E.M.上載駕車時拍下的照片，並留言：「下雨天，第一次在馬路上開車，心如鹿撞，哈哈哈哈！」她興奮網晒「第一次」，卻遭網民質疑她揸車用電話疑似違法，有網友質問：「請問在路邊開車可以邊開邊拍照？視他人安全不顧，這樣是違規嗎？」亦有網友呼籲G.E.M.要注意安全：「別發微博了！看前面的路！這孩子真讓人擔心呢！」

師傅話可以

記者昨致電G.E.M.，問到揸車拍照一事，她說：「我影嗰張相嘅時候停緊紅燈嘅，咁嗰陣時候呢我學緊車，咁我個阿Sir就坐喺隔籬，咁我問佢話依家紅燈咁我哋又唔開車，我可唔可以影一張相，佢話可以，我先至影嘅。」G.E.M.又直言有查閱運輸署網頁，她說：「上埋運輸署嘅網頁，睇番其實佢係有講到嘅，其中問答第五條：如司機在其所駕駛的車輛停紅燈時、塞車停下時或停泊在路邊時以手持方式使用手提式流動電話，會否違反新法例？第五條嘅答案係不會，因為新法例只適用於當車輛行駛時。所以其實我係冇違反交通規則㗎囉。」

有灰色地帶

雖然她認為自己未有犯法，但梁永鏗律師並不認同：「師傅未必熟悉法律條例，佢話可以都唔代表冇犯法。（G.E.M.指運輸署網頁話停車時用得。）其實係存有灰色地帶，唔影響駕駛之下係可以用（電話），但喺紅燈時架車未完全熄晒，架車係隨時可以郁得番，喺咁嘅情況下，你拎部電話出嚟用，甚至影相，都係隨時違反法例，最高刑罰罰款2000蚊。」

此外，G.E.M.日前現身北京，為腕錶品牌TAG Heuer擔任特別嘉賓，着上白色連身裙青春迷人，即場獻唱多首名曲，台下觀眾歡呼吶喊。

文：專案組