Rocky霉爆出碟被當送貨仔
樂隊KillerSoap主音陳樂基（Rocky）在《中國好聲音3》中成功彈出，雖然現在一舉成「鳴」天下知，但Rocky與其他成員曾經歷過十年寒窗無人問的苦況，成軍11年的他們自爆曾搬碟到唱片倉時，慘被當成送貨員，但五人直指為了玩音樂絕不介意！
KillerSoap主音Rocky在內地熱爆歌唱比賽《中國好聲音3》憑李克勤的《月半小夜曲》紅遍大中華，連克勤都在微博大讚他們的改編很聰明，力邀交流合作。一夜間Rocky的名字成為各大網站的熱門搜尋，連比賽所穿的服飾都成為購物網人氣貨品。
火速爆紅背後，Rocky與KillerSoap四位成員都經歷過霉爆日子，連租用的Band房都是與另一樂隊合租，Rocky說：「上年暑假十幾人落手落腳裝修，所有牆都係歐仔（成員）設計，佢識物理隔音資訊，由佢做判頭點我哋做，冇乜錢惟有盡慳，整咗十零萬。」成軍11年，五名大男孩坦言純粹貪玩，夾Band沒收入，最初表演連車馬費都欠奉：「近年先有車馬費，舊年我哋玩香港最大型嘅音樂節，成隊都有500蚊車馬費。」又自爆曾為交租要變賣樂器。
抬頭拒做廢人
五子以有限金錢出碟，錄音、監製、設計都一手包辦，又親身送貨到唱片店，但卻被人誤以為是搬運工人，Rocky說：「記得我哋出第一隻碟，我負責送貨，搬三箱碟去CD舖個倉，擺低後個職員叫我簽名確認。（覺得被歧視？）佢直頭當咗我係搬運工人啦，佢唔會發覺唱呢隻碟嘅人會自己搬嚟，佢哋唔會歧視裝修工人o架嘛。」
在香港做Band仔困難重重，但五子永不言棄，Rocky說：「冇諗過放棄音樂，若果放棄就係廢人一個。男人要有啲嘢嚟證明自己嘅價值，我哋幾個就係樂隊身份，當介紹時抬起頭同人講我係KillerSoap嘅邊個就會好開心。」
另外，上周五播出的《中國好聲音3》，導師汪峰選中女友章子怡的閨密莫艷琳，他說：「我選擇學員時，只希望聽到我需要的那種聲音。」而莫艷琳表示是瞞着章子怡來參賽。
化妝：形苑工作室
髮型：Frankie Tang
文：音樂組