薛凱琪生日起雙飛
歌手薛凱琪（Fiona）昨日33歲生日，最近忙於綵排下月紅館個唱的她，又要為新專輯錄音。要在錄音室度過牛一的Fiona，日前獲兩位緋聞男友湯駿業和Lawt打孖上現身，連同唱片公司揸弗人黃柏高（Paco）及一班公司同事，捧着插滿長頸鹿裝飾的生日蛋糕和香檳出現，替她賀壽。
出聲恨拍拖
喜出望外的Fiona接受電話訪問，被問到生日願望時說：「首先係屋企人同貓貓健康開心，其次係所有嚟睇我演唱會嘅歌迷都開開心心。」仍舊單身的她更明言恨拍拖：「希望搵到個啱嘅。」對於獲Lawt和湯駿業「起雙飛」現身慶祝，Fiona說：「佢哋唔係我男友，人哋名花有主。」同時她透露獲房祖名和方大同送上祝賀，大同更送上「Mic Stands」作生日禮物。
Fiona透露錄音途中監製借故器材有問題，叫她走出錄音房，誰不知眾人捧着蛋糕等她：「我嗰日成個癲婆咁，原本諗住補補妝，點知Paco佢哋等咗我好耐，真係好感動。」Fiona笑言昨日正日也要在工作中度過，但希望生日飯能一嘗至愛的「鹹蛋肉餅飯」。而Fiona好友湯駿業受訪時表示蛋糕是他特地訂製，上面插了25隻長頸鹿是跟壽星女開開玩笑。
文：音樂組