陳家樂急復工 老闆擔心

藝人陳家樂早前在台中拍攝英皇電影《破風》單車戲份時，意外炒單車，斷了鎖骨。在當地接受手術後，他日前回港留醫3日3夜，昨傍晚時分出院。英皇老闆楊受成、CEO利雅博及藝人部總監Angelina專誠前往接家樂出院，並送上生果籃慰問。家樂左手綁上繃帶固定手肘位置，自行步出醫院。

康復要半年

家樂提到康復進展：「醫生建議3個月後先好開工，但我想拍咗啲文戲先。遲吓仲有比賽戲份，好想同導演講畀我試吓，我等咗呢個機會好耐，想好好珍惜。（緋聞女友衛詩雅有咩表示？）佢第一日已經嚟咗探我，有安慰我。依家只係擔心唔夠靈活，所以每日都做物理治療，希望康復進度良好，但完全康復可能要半年。之前做手術作固定用嘅金屬片，都要等一年後，睇情況再決定拎唔拎番出嚟。我依家盡量唔食止痛藥，但出事時我啲皮膚『磨薑』，郁吓都痛，加上頸到胸都拉傷晒，瞓覺都要維持一個姿勢，好唔方便。」

英皇老闆楊受成（左）及CEO利雅博親自接家樂出院。

家樂指頸到胸都拉傷，郁吓都痛。

家樂又不忘多謝老闆楊受成的關心：「我想多謝番老闆，我喺台灣出事，佢第一時間發短訊，叫我返香港醫，但我當時太痛，於是喺當地做手術。都想多謝導演、台前幕後同助手，每日幫我洗傷口。（怕唔怕戲份被減？）冇所謂，由公司同導演安排，最緊要保得住條命，拍唔到都仲有下次！」

考慮用替身

楊受成則表示家樂受傷，確令拍攝進度受影響：「少少影響一定有，但唔緊要，最緊要個人冇事，見到家樂都開心番，佢康復比預期快。但遲啲有場比賽戲份，家樂都話想拍，嚇死我！千祈唔好！我哋聽日約咗導演（林超賢）同監製開會，商量係咪要用替身？同調整餘下戲份。（會全力支持家樂？）一定，應該！」

文：影視組