憶孫仔難捨霆鋒 四哥淚浸西班牙
謝霆鋒早前找來年近80歲的父親謝賢（四哥）為節目《十二道鋒味》到西班牙拍攝，兩人首次在內地以螢幕「父子檔」上場，四哥罕有地流露愛子之情，更因心痛兩孫仔Lucas和Quintus每次與霆鋒見面後不捨得告別，而在鏡頭前心痛落淚。
由謝霆鋒一手炮製的節目《十二道鋒味》前晚於浙江衞視播出，今集是霆鋒和父親謝賢往西班牙取景。面對父親的霆鋒變了開籠雀，但句句都啜核兼不留情。霆鋒介紹四哥給嘉賓陳妍希認識時，笑四哥已風乾70多年，牙都甩光。之後兩父子打獵，到四哥笑霆鋒不忍心射野豬，令大家見識到兩人的互窒相處方式。
兩父子又參觀西班牙廣場的許願池，期間霆鋒叫四哥許願，四哥扮型嘲霆鋒迷信，但四哥趁霆鋒許願時，又行到池的另一邊悄悄拋錢幣許願說：「希望謝霆鋒、謝婷婷過一個美好人生。」霆鋒許的願是想爸爸願望成真，足見父子心裏都是從對方出發。
轉戰內蒙晒廚藝
今集四哥談到兩個孫仔Lucas和Quintus時老淚縱橫，昨日網上報道指四哥是講到霆鋒和張栢芝離婚後，孫仔沒人照料，才心痛落淚，其實真實版本，是四哥每次見到孫仔和霆鋒見面後要回家，都不肯和霆鋒講再見，這一幕四哥看在眼裏心痛難過，所以才落淚。
至於霆鋒正身在內蒙繼續拍《十二道鋒味》，四哥亦有隨行，前日霆鋒和內地演員海清便到菜市場買食材，吸引不少人圍觀。
文：音樂組