Barbie谷G奶向星爺抓撈

周星馳擅於捧人，最近他執導的新片《美人魚》進行網上招募演員活動，短短數日已吸引約萬六名男女報名，相信於本月15日截止時人數會多出好幾十倍！

Hey到滴汗

從官方網看到參賽者照片，燕瘦環肥不乏騎呢人士，暫時票數領先的都是內地靚女，另外亦有多位曾拍港產片的藝人參加，包括「寸嘴Barbie」夏尉喻、周秀娜師妹許雅婷和袁紫僑，以及馬來西亞女星李元玲等，她們網上票數均不錯。而所有參賽者需經過三輪篩選，入圍者將有機會參演《美》片。

向來搞笑的Barbie自薦短片相當特別，她谷行G奶扮美人魚在泳池拍攝，未表演已夠晒養眼！但其表演項目令人摸不着頭腦，先是化身「Hip Hop美人魚」，un住表演「獨特的rap歌技巧」，全程「Hey」足三十二次，加上普通話不純正，令人睇到滴汗！其後Barbie摘下頸上珍珠再朗誦：「面對愛情，我很勇敢，苦海無邊，我也敢。」並論盡地跳入池中，游了幾吓後找回珍珠，並說：「我找到了！」效果超無厘頭，未知星爺是否識得欣賞。

Barbie在短片中無厘頭rap歌Hey足卅幾次又騷胸。	放大圖片	周星馳

來自外星

事後Barbie自嘲一向冇形象，不介意扮醜拍喜劇，問到是否有信心勝出？她說：「隨緣，有咁多人參加，有任何一個角色都會好開心。（點諗到呢個主題？）哈！我同美人魚一樣來自外星，唱歌好聽，又對愛情執着，我用珍珠比喻愛情，就算唔太識游水都照跳水，代表願意為愛情冒險。」

文：影視組