Eason玩寸平胸妻 跑步零負擔
音樂人郭偉亮（Eric Kwok）作品展前晚正式在紅館開鑼，人緣甚廣的他有幸請來一眾天王天后撐場！不過Eric對好友毫不畀面，到處辣火頭寸爆嘉賓，除了沒到場的謝安琪「躺着也中槍」，身為Eric「最佳損友」的陳奕迅（Eason）為博觀眾一笑，更將老婆徐濠縈擺上枱，暗嘲老婆身材平平，唔怕返屋企罰跪玻璃？
Eric Kwok一連三場的《我最喜愛的Eric Kwok音樂會》前晚假紅館舉行頭場，圈中人緣甚廣的他請來Eason、老婆葉佩雯、「歌神」張學友、葉蒨文、梁漢文、蘇永康（阿公）、許志安、劉浩龍、楊千嬅、王梓軒、鄭希怡等擔任嘉賓，可謂星光熠熠！其中「最佳損友」Eason共獻唱六首歌冠絕嘉賓，當阿公獻唱Eason的《當這地球沒有花》時，竟把最後一句改做「當這地球沒有Bra」，更抵死地問Eason：「如果呢個世界上從來冇胸圍，將會變成咩世界？陳博士，呢首歌係你嘅，你有權發言。」
假設地球沒有Bra
Eason即「吹神」上身說：「跑步嗰啲，如果冇呢樣嘢會唔平衡，細個住嘅地方有好多外籍人士跑步，我發現冇戴Bra會係咁……」說罷即烏身扮跑步，阿公打蛇隨棍上說：「假設地球沒有Bra，尊夫人（徐濠縈）跑馬拉松應該都冇乜影響。」Eason聞言抵死地扮老婆「零負擔」健步如飛的樣子，令全場捧腹大笑！
雖然Eric請來眾巨星做嘉賓，但竟玩盡好友，當他介紹《囍帖街》時，因當年謝安琪（Kay）和舊東家環球不歡而散，故Eric不忘暗寸沒到場的Kay：「我打畀謝安琪，佢話真係好想好想嚟，不過之後佢經理人又話佢嚟唔到喎。」Kay經理人森夏美昨日受訪時承認Eric Kwok曾邀Kay做嘉賓，但因檔期問題未能出席。之後Eric請出曾翻唱《囍》的阿公上台獻唱，更不忘向未唱過其作品的阿公抽水：「蘇永康，作品包括……係冇嘅！」阿公亦不禁自嘲：「做兄弟就兩肋插刀，但點解把刀成日插喺我身上？」而千嬅上台時，Eric Kwok特別送上火辣三點式「贈興」，更笑指：「係你老公（丁子高）託我買！」令身材平平的千嬅哭笑不得說：「冇可能！其實fit喺下半身，上半身fit唔晒。」
獨對老婆耍冧功
雖然在演唱會上玩盡眾嘉賓，但Eric唯獨對老婆葉佩雯大耍冧功：「我第一日識葉佩雯，佢水都唔識煲，但今次演唱會幫我處理晒所有嘢，佢係我最得力嘅助手，我想講畀大家聽，最幸福係我，郭太你真係好好！錢我真係冇乜，繼續唱啲幸福畀你。」之後兩公婆拖手獻唱。
另外，前晚作為座上客的謝霆鋒被發現在《十二道鋒味》內爆粗，霆鋒經理人霍汶希受訪時向觀眾致歉：「可能內地嘅工作人員聽唔明粗口，所以冇剪到，英皇就呢件事向觀眾致歉，我哋會搵專人去負責檢查。」
文：音樂組