梁嘉琬當家作主
「人冇夢想，同條鹹魚有咩分別？」模特兒梁嘉琬（Whitney）年紀輕輕已深明此道理。曾經一夜成名的她經過一年的沉寂，終於為自己找到人生方向，正逐步向主持夢進發的她誓要擺脫花瓶形象，成為獨當一面的主持人。
模特兒出身的梁嘉琬去年參加無綫節目《決戰一分鐘》而彈出，惟未能把握機會簽約電影公司，令人氣瞬間下滑。然而幸運之神並未離開，她及後獲有線電視賞識主持寵物節目《怪獸學堂》，現更成為足球節目《智勝館》的主持。由模特兒轉型為主持的Whitney說：「其實本身都想做主持，所以我好感激有呢個機會，始終做model壽命唔會好長，但做主持就唔同，而且做直播節目可以畀我鍛煉到口才同執生。」
想做黃翠如
Whitney自小已有夢想，希望能成為旅遊節目主持，更視同樣以旅遊節目起家的黃翠如為目標，並希望能像對方般入屋。不過講到最欣賞的主持，她二話不說：「我覺得DoDo姐（鄭裕玲）主持好叻，佢有教養得嚟，英文又叻，一行出嚟就好有台型。」
事業仍在起步階段的Whitney，年紀尚輕卻直言恨拍拖，擇偶對象首選成熟型男士：「以前嘅男朋友都係同學，但我依家鍾意啲大過我嘅，十年以內我都接受到，因為佢哋比較踏實同畀到安全感我。」Whitney對男友外形沒有特別要求，惟希望對方與自己一樣擁有夢想：「我鍾意啲有夢想嘅人，因為專心嘅人感覺好有魅力。」
文：張浩恩
攝：劉斌
場地：Hooray Bar & Restaurant