吳若希愛大隻男 怕咗激凸謙仔
歌手吳若希、羅仲謙、蔡思貝等昨日於電視城，為無綫新劇試造型。期間吳若希直認情傾大隻男，但笑稱「未夠膽」與被封激凸「現袋人」的羅仲謙拍攝親熱戲鏡頭！
歌手吳若希（Jinny）、羅仲謙、蔡思貝等昨於將軍澳，為以單車為主題的無綫新劇《衝線》試造型。期間身穿緊身褲的謙仔因下身現形而被封「現袋人」，與同場沈震軒、溫家偉及周志文齊齊扮成激凸單車選手亮相。
訓練整傷腳
短裙上陣的Jinny見狀時不尷尬，更high爆直認鍾意觀賞大隻男線條：「我以前幾個男朋友都有咁上下大隻，我喜歡運動型男仔，因為心口厚同膊頭闊，好有安全感同有承擔。（拍劇乘機（目及）仔？）望吓都過癮，我鍾意睇男仔嘅線條！」但她自爆於新劇中無膽與「名草有主」的羅仲謙親熱：「同謙仔有感情線（親熱戲？）我未夠膽呀！（知道佢有女友？）知，唔係公開咗o架咩？」
問到激凸的謙仔會否感尷尬？他自爆「無下裝」上陣，並謂：「會，因為着呢種褲冇得着底褲，不過有塊好厚嘅墊（僭建加強效果？）唔使，塊墊太厚！（於新劇晒肌肉？）冇機會晒。」首度擔正男主角的他表示為新劇整花腳：「我訓練咗兩個月，隻腳都花晒，拍劇時可能要用遮瑕膏。」至於與謙仔、沈震軒及Jinny上演四角關係的蔡思貝則以短髮示人：「咁會入戲啲（剪去長髮？）好爽！我仲可以將化妝Set頭嘅時間攞嚟瞓多啲覺！」首次擔正女主角的她更自爆為新劇狂練踩單車。
無綫之前取得四年一度世界盃播映權，14日凌晨三點播放的德國對阿根廷冠軍戰節目中，就錄得平均收視12點，（78萬觀眾收看），而最高收視達16點，（104萬觀眾收看），而平均及最高收視的收看百分比為100%。
文：影視組