發哥泰Fit 家輝稱臣
【陳偉立泰國直擊】賭神再現，「張七帝」都變fans！周潤發昨日於泰國為王晶新片《賭城風雲2》開工，新一集賭神look亦曝光，發哥以深色V領西裝配灰色窄腳褲，再加三七分界頭，型爆現身，身形明顯比去年更fit更清減，他一步入片場即成焦點，難怪同場的影帝張家輝都變粉絲，讚發哥是戲壇至尊，經典角色多不勝數，無人能及！
59歲的周潤發去年接拍王晶電影《賭城風雲》，今年賀歲檔上映，內地大收5.3億人民幣，電影公司見好再拍續集，更不惜工本拍3D版，並加入影帝張家輝，兩大影帝鬥戲，睇頭十足！昨日發哥於泰國首日開工，其新賭神造型曝光，他穿深色V領孖襟西裝配灰色窄腳西褲及皮鞋，因西裝貼身，令發哥的fit爆身形更明顯，再加三七分界髮型，可謂型盡全場。
發哥昨與張家輝及余文樂等拍大型槍戰、快艇追逐戲，家輝是「張七帝」，但發哥81年已憑《胡越的故事》首奪金馬影帝，當時家輝還未入行，所以家輝面對發哥頓變小粉絲。記者問家輝，今次有甚麼絕招抗衡發哥？他笑言：「絕咩招吖，佢係戲壇至尊，一嚟到啲氣氛好愉快，因為佢好開心！（發哥話因為你先接呢套戲喎！）講笑啫！我因為佢先接，我同普羅大眾一樣，都係睇佢嘅戲大，佢有好多經典角色。」
謙稱因家輝才接《賭2》的發哥，對家輝加入大表歡迎：「多謝佢入組，多啲人多啲開心，（今次拍續集冇謝霆鋒喎！）檔期夾唔到，上次好好成績先有得拍落去，隨時可以返嚟！（有第3、4集？）可以繼續拍。」
發嫂攬實童星
發哥揚言心情愉快，因有自己最喜歡的泰國河粉，問新戲有甚麼危險場面？發哥笑言：「今日已經好危險，槍林彈雨，係咁踎低起身，（之後有快艇追逐戲？）係，要搵個墊墊一墊舒服啲。稍後同劉嘉玲去芭堤雅遊山玩水拍感情戲，同嘉玲超過20年冇合作，對上一次係舞台劇《花心大丈夫》，知佢又做舞台劇，仲好賣得、爆到瀉，恭喜！」
家輝與內地童星王詩齡飾父女，戲外眾星齊氹王詩齡，期間因詩齡扭計，家輝即顯慈父本色，陪詩齡掟麵包逗她，而發嫂一到場即攬實詩齡，令詩齡開心番，發哥也有幫手照顧詩齡的替身。
另外，家輝談到世盃決賽，直言早已估德國贏，對於被指貌似阿根廷球星美斯，他笑言：「咁希望我下次好運啲！」