馬國明踢波 揸流攤贏學生哥
馬國明（馬明）昨日率領新劇的男演員落場與學生於炎熱天氣下鬥波，因馬明要趕去開工，不敢去到盡，於場上「揸流攤」，但憑敖嘉年和曹永廉出術，最後反勝贏波！
無綫男神馬國明昨日聯同新劇《寒山潛龍》的林夏薇、李詩韻、敖嘉年、曹永廉、羅鈞滿等多位演員踩入學校為劇集宣傳，馬明與一眾男演員與學生足球隊來一場五人足球比賽，一眾女演員化身啦啦隊吶喊打氣。由於天氣炎熱，人人踢到身水身汗，期間敖嘉年與曹永廉更出術搬龍門，力阻學生隊入波，最後藝員隊反勝學生隊。
唔敢去盡
在場上跑動少「揸流攤」的馬明，解釋因天氣熱：「我鍾意夏天踢波，但一陣要返公司開工，唔可以去到太盡。」提到新劇收視下跌，馬明仍然對新劇充滿信心：「可能因為啲人嘅話題喺世界盃，我上網睇套劇嘅反應幾好。」至於有觀眾投訴劇集服飾和用語跟宋代有差別，他說：「其實睇個人點睇，為表現角色係低下階層先會用詞較市井，但冇粗口，我哋會接受意見。」
林夏薇被問到會否喜歡識踢波男仔？她說：「鍾意健康、做運動嘅男仔。（世界盃期間有冇異性約你睇波？）成班同事不時喺化妝間一齊睇。」
文：專案組