盛品儒箍煲 蔡一鳳唔騷
前亞視執行董事盛品儒被《東網》足本直擊夜撻「嫩口謝安琪」郭奕芯（Ashina），氣得女友蔡一鳳（Michelle）開腔劃清界線，自爆二人早已分手，知衰的盛品儒漏夜在網上揚言：「要箍煲！」可惜Michelle不肯領情，只認再見亦是朋友，箍煲凍過水！
自稱集「後生、靚仔、高層」於一身的「花弗」盛品儒，上周被《東網》直擊偷嗒o靚模組合Super Sexy Hero成員「嫩口謝安琪」郭奕芯（Ashina），二人醉攬街頭後，雙雙直搗「盛宮」15分鐘。事件令盛品儒的富貴女友Michelle睇到眼火爆，更自揭早已情逝劃清界線，難怪盛品儒前晚與Michelle分別去睇張智霖個唱時，不時皺起愁眉，擺明無心享樂。至凌晨兩點，終於的起心肝，在Facebook轉載《東網》報道並信誓旦旦宣言：「要箍煲！」
保持朋友關係
盛品儒揚言箍煲，獲不少好友留言力撐，本報昨晚致電他，問是否想箍煲？他直言：「係呀！我依家喺深圳做嘢，唔方便講！」接着急急收線。然而，Michelle昨晚接受電話訪問時，只以「朋友」形容盛品儒：「我暫時覺得同佢保持朋友關係最合適，以後會點，順其自然。我冇所謂，最重要屋企人鍾唔鍾意。」
Michelle堅稱對盛品儒「偷食」沒不開心，又透露盛品儒曾解畫：「有少少震驚，本來以為佢咁宅男，應該唔係好多女仔鍾意，佢尋日（前日）有同我解釋話醉咗，個女仔先送佢上屋企，我都相信，我覺得如果個女仔唔係鍾意佢，唔會親自送佢返去，飲醉酒去一個男士屋企嘅危險程度，我諗一般女仔都分析到。」
舊愛證酒量差
Michelle又撐盛品儒專一，她指二人拍拖八個月，盛品儒給她一百分安全感，故現時為他講好說話，無非報答其真心：「就算發生呢件事嗰陣，我同佢仲喺一齊，只要佢話冇下文，我會體諒，何況佢依家係朋友，佢可以選擇完全唔解釋，但佢揀咗交代，所以我覺得就算飲醉心情不佳，發洩又好，一個笑話，過咗去就算。」Michelle又引述昔日的甜蜜情史，指盛品儒易醉：「有次去韓國佢醉到唯一一次激到我喊，點知佢第二日竟然唔記得晒！又試過同Paco（黃柏高）飲酒，佢醉到喺『小Paco』上面瞓咗。」
文：專案組