傅穎狂操腹肌壞得起
因為食令自己脹了一個碼的傅穎，近日的起心肝減肥，更迷上玩gym狂操，她寧願操到平胸，都希望擁有從未出現過的六舊腹肌。近年在內地一劇接一劇的傅穎，在新劇中首次演壞女人角色，她覺得很富挑戰性。
近年積極在內地搵人仔的傅穎，特別搵健身教練操弗身形，她自爆有段時間好肥：「嗰時有人話我真係幾肥，要減肥，我仲話唔係呀，幾好呀。」直至年初拍完劇由橫店返港，她足足肥了10磅：「去到嗰刻我真係知唔得啦，要做番運動，的起心肝做gym。」
「寧願冇胸」
經健身教練指導了兩、三個月，傅穎終甩掉10磅肥肉，但她未感滿意：「我想要六舊腹肌，第一次見教練時，我同佢講我只係要一樣嘢，就係六舊腹肌。佢話女仔可以唔使，但我想睇吓自己做唔做到呢件事。（依家練成點？）未有腹肌，只係見到少少痕。」對圈中不少男星勁操到零體脂，傅穎大讚厲害：「要操到咁好難，尤其係女仔，我寧願冇胸都想要腹肌。」
傅穎狂操弗，另一原因是為內地新劇穿旗袍的造型，她指今次的角色充滿挑戰性：「今次套劇得我一個香港演員，係民初劇，我要做壞女人，仲係寡婦，有好多心路歷程。首次做呢啲角色，有好多內心戲，覺得好大挑戰。」
文：音樂組
攝：劉智源
場地：紅磡都會海逸酒店