蘇康12.2做老襯 百萬婚宴娶Anita
歌手蘇永康（蘇康）月來盛傳將結婚，準新郎昨日終向本報親證年底跟拍拖八年的女友馮翠珊（Anita）共諧連理，大婚日期為12月2日，於港島五星級酒店大排筵席五十圍，豪搞「喧賓奪主」百萬婚宴，蘇康更向一眾好友鳴謝，助他訂餐廳及以六位數訂購逾三卡巨鑽，令他毋須下跪也求婚成功！
現年46歲的蘇康和37歲的時裝品牌高層女友Anita，同甘共苦拍拖八載有情人終成眷屬，早前有傳他們於聖誕節期間擺喜宴，但據本報得知婚期為12月2日，將假港島區五星級酒店舉行註冊儀式及婚宴。
Wyman見證京都求婚
除了BIG FOUR及「衰多口」被蘇康鬧無腦的吳國敬任兄弟外，媒人陳奕迅（Eason）及太太徐濠縈（阿徐）會出任男女證婚人，又會廣邀近百圈中好友攜眷出席，屆時定必紅星雲集，卡士猶勝音樂頒獎禮！據知，當初蘇康矢口否認婚訊，全因婚禮細節未定，深怕影響圈中好友的工作檔期外，亦擔心喜訊被誤為出碟期的宣傳橋，如今他跟準太太的檔期已夾好又訂妥酒席，故他覺得也是宣布喜訊的適當時候。
昨日在身在台灣工作的蘇康接受長途電話訪問時，直認佳期：「係呀，係12月2日，當初因為要擺成四、五十圍，香港唔係咁多五星級酒店做到，多得拉姑（謝霆鋒母親狄波拉）幫忙喺好短時間搵到。」問蘇康如何成功求婚？他大方透露月前在京都求婚，見證人有黃偉文（Wyman）以及雙方的母親、女友的姑姐及姑丈。
謝眾軍師夾計幫忙
蘇康能「一take pass」全靠Wyman、阿徐、張衞健太太張茜、梁漢文老婆Karen夾計幫忙，他說：「嗰陣覺得係『時候做嘢喇』（求婚），咪同女友帶埋啲阿媽，仲有軍師Wyman一齊話去京都旅行，Wyman就幫我諗開場白，阿徐就幫我越洋訂餐廳，張茜幫手搵咗粒最完美嘅黃鑽，Karen幫我套女友手指嘅size，自己就只係訂玫瑰花同出聲啫。（可需當眾下跪才成功抱得美人歸？）冇喎，我只係問咗佢一句：『我想你陪我行埋呢一世，有乜意見？』我女人就答『好呀。』就係咁咋。」至於是否早日生BB？蘇康說：「結婚唔係為生B，只係時辰到。」
文：音樂組