陳鈺芸披婚紗行騷恨嫁
武打女星陳鈺芸（JuJu）昨日為婚紗騷擔任模特兒並以「黑魔后」造型行騷，已行過幾次婚紗騷的她被問到對穿婚紗可會覺得麻木？她說：「唔係行過好多次，都鍾意着婚紗，雖到適婚年齡，但未遇到啱嘅對象。讀書時就試過有男朋友想向我求婚，嗰時咁細個所以拒絕咗。」
JuJu透露六月底將會出戰首個泰拳大賽，現在正進行地獄式訓練，她說：「日日都喺正午12點烈日當空之下跑7km，訓練體能同耐力，練拳操到對腳都粗晒，好多肌肉，唔敢着短裙短褲。我有信心贏，希望攞到我第一條泰拳腰帶。」而比賽後她就會拍三部電影。