Gary以「孝」為先 DaDa唔敢埋身

韓國人氣主持Gary前日來港，昨日現身將軍澳新都城中心舉行的世界盃活動，據知大會以七位數重金邀請Gary出席活動，近千名粉絲聞風而至，企滿商場兩層。Gary甫出場便以廣東話說：「大家好，好多謝大家等我。」以及「我愛你」，冧爆粉絲。大會安排了低胸短裙上陣的女星陳靜（DaDa）同場，Gary大讚DaDa靚女，又揚言若有機會來港拍MV，會邀請對方當女主角。此時，粉絲起哄以韓文大叫宋智孝的名字，Gary解圍說：「今日唔係星期一。」之後兩人在遊戲環節中要以指定的身體部位運球，但卻抽中臀部與額頭，由於位置敏感，為免再次觸動粉絲神經，司儀即時重抽紙牌，最後頭貼頭運球，但粉絲依然不放過二人，再次以韓文大叫「宋智孝」，Gary搞笑地打圓場說：「唔好話畀宋智孝聽，係秘密。」

入後台先敢傾偈

事後，Gary自稱屬慢熱型，故首次跟DaDa見面便要有親密接觸而感尷尬，但就不怕粉絲呷醋，因為香港粉絲大方又乖巧。他又透露前晚吃了片皮鴨、小籠包及點心，大讚好味，並賣口乖稱想到香港居住。至於DaDa在活動上表現得相當避忌，受訪時她直認怕對方粉絲呷醋，並笑言：「我都好鍾意宋智孝，我唔尷尬，係Gary尷尬啲。（覺得Gary點？）佢好好人，喺後台佢有主動同我打招呼，有傾偈、合照同簽名。」

昨晚，Gary到機場準備離港，後面跟住一班粉絲。

昨午，Gary的帽突然被粉絲取去，令他大嚇一跳。

拉隊揼骨兩粒鐘

此外，Gary前晚在金鐘用膳至10時多，之後拉隊到中環揼骨近兩小時，原本Gary有意到蘭桂坊玩樂，但礙於太多粉絲守候，最終無癮回酒店。而昨日Gary於下午4時許在保安護送下現身機場離港，被半百粉絲包圍，Gary識做地頻頻揮手及講多謝，之後便由職員通道入閘，結束兩天訪港行程。

文：名人組　

攝：追蹤組