娜姐撐里奧 誓捧英格蘭
周秀娜昨日出席世界盃活動時，輕露兩吋事業線及小蠻腰，與森巴女郎齊跳森巴舞，雖然她的英超球星緋聞男友里奧費迪南（Rio Ferdinand）今屆無份出戰世界盃，但里奧有份講波，她當然會支持英格蘭。
周秀娜（Chrissie）昨日以吊帶低胸露腰裙出席世界盃活動，輕露兩吋事業線及小蠻腰，相當養眼，不過論性感程度遠不及同場兩位火辣森巴女郎，她又即場與兩女郎齊跳森巴舞。問到Chrissie為何不以森巴女郎的性感打扮上陣？她說：「我唔知，嚟到先知我自己都要跳埋，下次吖，下次可以一起森巴舞。啲森巴女郎着得好靚，個羽毛頭飾都唔輕，如果我着要訓練啲體力先，戴咗個頭飾冇人敢埋身，啲羽毛會拂到人。」
無緣親睹世盃
至於可會到巴西睇世界盃？Chrissie說：「有朋友喺嗰邊，有問我去唔去，佢最近生咗小朋友，我都想去探佢，不過安排唔到，套戲8月開拍，同埋要做定啲準備工夫，要健身。套戲因為Chilam（張智霖）好忙所以延遲咗開拍。我會喺香港同朋友一齊睇波，可能嚟我屋企睇，我下廚。」Chrissie四年前與英超球星里奧費迪南於網上認識，兩人其後成為好友還傳出緋聞，去年更一度傳里奧斥資八位數字入股Chrissie有份投資的娛樂公司，問到Chrissie今年世界盃支持哪一隊？她毫不思索說：「我支持我個friend里奧費迪南。（佢今年冇份踢。）佢冇份踢但佢會講波吖嘛，我支持英格蘭或者巴西，主辦國應該會有主場之利，尼馬好犀利。」
文：名人組