劉愷威掛女心切 小糯米留港讀書

楊冪（右二）挽着劉愷威手臂，與睡在嬰兒籃的B女一齊出院，榮升爺爺的劉丹（左一）笑到見牙唔見眼。

內地女星楊冪端午節前夕剖腹產女，經過五日休養，昨日以上佳狀態出院，劉丹夫婦、劉愷威胞妹及楊冪經理人昨日十時許先後乘車到場，接送母女二人。約上午十一時許，氣色紅潤的楊冪由老公劉愷威「傍實」現身，以藍色披肩搭配短裙遮肚的她依舊面尖尖及手腳纖幼，未有出現產後臃腫情況。愷威則手挽放着囡囡「小糯米」的白紗嬰兒籃步出醫院正門，現場所見，其囡囡正在籃內甜甜睡着，當他們應要求拍全家福時，愷威頻頻以手遮掩囡囡，似乎深怕她被閃光燈驚醒，認真愛女心切！其後愷威夫婦及劉丹夫婦笑容燦爛地感謝傳媒的祝賀。

步履輕快的楊冪在奶奶、其經理人及愷威胞妹開路下，登上七人車等候愷威一同離去。而愷威確認家人安全上車後即興奮接受訪問，大爆「升呢」做爸爸的感受，他直認開心到喊及離不開囡囡：「好開心，離開幾步都會好掛住囡囡！（第一眼見到愛女開心到喊？）真係好開心，都唔記得自己幾時喊，心情難以形容，依家先有少少習慣做爹哋。（囡囡似邊個？）集爸爸、媽媽、爺爺同嫲嫲於一身！」

依舊纖瘦的楊冪愛女心切，不時查看B女的情形。

劉愷威上車時被傳媒包圍。

學換尿片

問到愷威有否為囡囡餵奶及換片？這位新手爸爸笑言正在學習：「要趕返去換片。（雞手鴨腳？）OK，仲學習緊！（囡囡姓名？）未改呀！（搵相士改？）唔會，搵爹哋（劉丹）改！」至於有孫萬事足的丹爺昨接受電話訪問時笑晒稱已定湊孫時間表，但毋須向劇集《愛．回家》請假：「日頭開工夜晚就見到孫女啦！（留港讀書？）會喺香港生活、讀書，香港教育唔錯，（搵定學校？）又唔使咁快，我哋都唔會畀壓力佢！」

文：影視組