FFx做媒騷 2個粉絲照加場
騎呢四人女子組合FFx昨午在商業大廈內的攝影室舉行迷你演唱會，最可笑是僅得24張膠摺櫈，布景只掛上大海報就算，fans只得一、兩位當記者影「吉位」時，FFx經理人緊張得喝令工作人員「快啲坐落去」填補空位，明顯做媒！期間又叫「歌迷」揮螢光棒、拍掌、尖叫，最抵死是將自製的「FFx」紙牌遞給現場工作人員扮歌迷「舉牌」，行為極度騎呢。
台上剝裙褂
四女穿上裙褂獻唱新歌，唱至尾段突然背向觀眾跪地「換衫」，除去裙褂剩下早已打定底的Tube Dress，四人邊唱邊跳，舞姿求其，簡單扭腰及Fing手，全程演唱五音不全兼走音，一口氣連唱三首歌的FFx突然坐在木櫈上答問題，令人費解。
怕歌迷辛苦
問到為何得24個座位？成員Shirley說：「基於安全理由，原本係80個企位，唔想辛苦歌迷變坐位，所以今晚（昨晚）仲有一場。（兩場加埋都係得48個位？）之後會再安排。」問到為何會用「演唱會」三個字？她們死撐說：「想答謝歌迷，名唔緊要，最重要係效果同實力。」
文：音樂組