龔嘉欣胸狠預告殺退許亦妮
無綫藝人龔嘉欣、李亞男和許亦妮等昨日現身馬鞍山《2014 TVB最受歡迎電視廣告大獎》宣傳活動，三女各自出招，嘉欣騷長腿、李亞男少許透視露腰，許亦妮則輕露事業線。當中甩拖的嘉欣自爆即將三點式拍纖體廣告，儘管昨天衣着不算搶鏡，但勝在作出性感預告，果然單身姑娘最「胸」狠！
龔嘉欣、李亞男、許亦妮、張曦雯、吳業坤、羅孝勇及蔡康年，昨日出席《2014 TVB最受歡迎電視廣告大獎》宣傳活動，龔嘉欣露腿，許亦妮微露心口事業線，李亞男則穿上露腰裝，為炎熱天氣帶來透心涼視覺享受。
儲姑婆基金
現時單身的龔嘉欣透露即將三點式示人，她說：「嚟緊拍纖體廣告，着三點式，依家24吋腰，目標瘦到23吋，上次嗰輯下身有條細布仔，今次冇，人工有加，好開心嘅價錢，我會儲起做姑婆基金。對愛情心淡，好多姊妹為我介紹，但唔啱，再等吓，唔心急嘅！（同『逼婚變逼分』好姊妹姚子羚共同進退？）佢哋係了解過唔啱至分開，佢冇逼婚，依家都有追求者，想了解多啲至開展新感情，我同佢互相幫眼。（佢傷心到狂喊？）佢係好堅強嘅女仔，唔會為感情喊！」
李亞男提到身上的露腰裝有輕微透視，她說：「透視太多易走光。（男友王祖藍唔准太性感？）唔係，次次都係做完嘢至影相畀佢睇，佢會話：『可以再靚啲！』（有冇呷醋祖藍話想同謝安琪拍親熱戲？）睇吓係咪劇情需要，藝術角度OK，如果係報復就唔係咁好！」
許亦妮則稱曾有朋友遇電影人藉詞開戲識女仔，她說：「我聽過有人會借拍戲為名識女仔，我身邊有人試過，面對呢種引誘要聰明少少，我啲朋友都好醒，冇中過招！有自稱幕後人約出去傾電影，我都會叫埋經理人陪，唔會單獨出去，所以我唔擔心會遇到呢種情況。」
文：影視組