姚書軼獲妙芝幫手 峰騷做主持
名模姚書軼（Mikki）早前邀約好友歐陽妙芝擔任她主持節目的嘉賓，兩人坐遊艇出海，面對美景宜人，貪玩的妙芝一時興起，竟向穿比堅尼的Mikki施襲兼上下其手，難得Mikki大方不介意，還感謝對方出「手」相助。
首次擔任網上節目主持的Mikki，頭炮即坐遊艇出海拍攝，她特別請來名模好友歐陽妙芝陪她處女下海，當日Mikki穿上比堅尼，外披一件薄紗，甚為性感。至於減肥成功的妙芝，雖同樣穿比堅尼，但外加一襲透視短裙，相對較為密實，兩人大談穿泳衣的要訣及護膚心得。鏡頭前兩人儀態萬千，但鏡頭後，妙芝卻大玩鹹濕，向Mikki連環出擊，來一招托胸及扯bra，Mikki嚇到呱呱大叫，拚命力保幸免飛bra走奶。
有比堅尼打底
Mikki說：「唔知點解做咗人媽咪啲人咁狼，以前嘅妙芝好保守，好有儀態，嗰日佢係咁對我上下其手，好在我有比堅尼打底，畀佢嚇親，不過我好多謝佢今次拍膊頭幫我。」Mikki又表示從未想過做主持，揚言最大挑戰是唸廣東話對白，上海出身的她，雖來港多年，但廣東話仍然是她的弱項，笑言自己語言方面太「遲熟」：「講得快會亂龍，但慢慢講，有時都講到好似講粗口咁。」
文：名人組