呂方新戀情曝光 嘟嘟嗌眼冤

與鄭裕玲分手六年的呂方，一直過住「冇腳雀仔」的浪子生活，但他年過半百後，始終鳥倦知返，昨日被《好報》獨家披露秘嗒一名甚有嘟嘟影子的高挑中女，兩人更已半同居。

為重振雄風，呂方將骨子裏的大男人性格在街市爆發，日前下午四時，呂方先載新歡到天后街市拍拖買餸，落車後他點女友先去買菜，自己就到海鮮檔揀海鮮，實行全晚菜式都要由自己話晒事。兩人會合時，呂方第一時間將手上一大袋海產遞給女友，使盡這位「阿四」女友。

鄭裕玲昨日返電台時向記者打招呼。	與女友下車時，呂方眼望望似怕被發現。	《好報》踢爆呂方有新戀情。

煮愛心餸菜

據知呂方在家不時下廚炮製愛心菜式冧女友，其女友勝在聽教聽話，常為男友錫住荷包，難怪氹得呂方每日都管接送，相信會隨時閃婚！昨日本報致電呂方，問是否有新女友？他似想保護新戀情，只笑着說：「黐線，我做緊嘢，唔得閒，唔講啦！」他收線後一直潛水，拒接電話。

呂方舊愛嘟嘟則繼續過黃金盛女生活，昨日獨自揸車返電台開咪，有備而來的她笑容滿面，更向記者揮手打招呼，提到呂方有新歡，嘟嘟即閃入電台。嘟嘟昨做節目時，大談香港「眼冤」的建築物，並教大家眼冤的英文「Eyesore」，未知是否對舊愛的新戀情感到眼冤！

文：音樂組