岑麗香遇襲 慘變大細面
「宅男女神」岑麗香近日擔大旗拍錢國偉執導新片，豈料開工首日慘變「大細面」，原來她瞓覺時被蚊突襲咬面！而一同特訓的何佩瑜（Jeana）則練到拗柴需立即包紮，但她仍忍痛親自上陣，相當專業。
「宅男女神」岑麗香（香香）、鄭欣宜、何佩瑜（Jeana）及黃柏高力捧新女蔡潔和崔碧珈（Anita）等，早前拉大隊到馬來西亞等地，拍攝導演錢國偉執導新片《辣警霸王花》。為應付大量動作場面，眾女事前又進行密集式特訓，既要練拳又要野外挑戰吊索，可謂「有姿勢有實際」。片中，較多踢腿動作的Jeana，早前更苦練到左腳拗柴，師傅也立即為她包紮，敬業的Jeana之後亦負傷上陣，以免影響拍攝進度。
欣宜為肥請命
首次擔任電影女主角的香香，日前甫抵達馬來西亞下榻酒店，未知是否太過皮香肉甜，當晚遭毒蚊咬腫左邊面頰，翌日開工的香香慘變「大細面」，她即向錢導演嬌嗲「怕唔夠靚」，豈料反遭對方調侃：「唔怕，你個蘋果肌咁脹，唔使打botox啦！」由於今次又落水又集訓，錢導透露一眾「警花」都很緊張體能狀態：「佢哋又唔可以唔食嘢，但又驚食嘢會肥，所以班女仔都幾矛盾。」
此外，欣宜、香香和伍允龍等前日在大馬出席記者會，近日翻脹的欣宜自言已放棄減肥，但揚言要為肥人出頭：「肥人唔代表醜，瘦人唔代表靚，最重要係健康，社會抹殺咗肥人做唔成事，但我希望藉呢部電影畀人知我得，同時畀肥人一個機會。」香香則謂拍劇時累積了飛虎隊的知識，又稱能體驗從高樓吊湲游繩很難得。
跟馬來西亞演員李元玲飾演情侶的伍允龍，被問到為何不推薦緋聞女友鍾嘉欣，是否擔心對方受傷？他表示與任何人合作都開心，嘉欣會自己決定想參與的角色，不會擔心。
文：影視組