學友買樓搭沉船 險破產
四大影帝梁朝偉、張家輝、張學友和梁家輝齊賀上山詩鈉新店開張，席間張學友表示自己與搞生意無緣，憶述當年與曾志偉合作投資買樓差點破產收場的經歷，在旁的張家輝聽後也感嘆說：「乜咁嚴重呀？」
梁朝偉、張家輝、張學友和梁家輝四位影帝，以及邱淑貞夫婦、阮兆祥、葉童夫婦、杜德偉夫婦、周汶錡、王祖藍和李亞男等，昨日出席好友上山詩鈉的火鍋店開幕活動，王菲女兒竇靖童特地從北京來港支持契媽。上山詩鈉興奮得滿場飛，不時向嘉賓獻吻，張家輝和張學友「兩兄弟」結伴到場，全程搭晒膊頭如孖公仔。問兩人會否合作搞生意？學友說：「唔會嘞，攬住一齊死咩？我搞過但得個吉，甚至個吉都冇埋。試過同曾志偉合作買樓，點知瓜咗仲爭啲破產，但佢一個人搞又冇事喎，所以係我問題，都係腳踏實地好。」張家輝聽後也帶點感慨說：「咁嚴重呀？我都唔得o架。」
張家輝又表示會拍《賭城風雲2》，有機會與周潤發合作，他說：「梗係好啦，仲想點呀？」有指他頂替杜汶澤拍此片，張家輝堅持由學友代答，學友說：「係都搵我頂啦。（你酬勞貴）我平過張家輝，頂杜汶澤仲平啲。」
杜德偉周汶錡碰頭
同場的杜德偉與舊愛周汶錡碰個正着，未見二人打招呼，杜說：「之前約過食飯，我太太都喺度，唔係大家咁講話尷尬，但我未見過佢丈夫。」梁朝偉表示與張家輝、張學友和梁家輝經常私下有聚會，但他自言沒興趣做生意，現正放假中為稍後開拍的時裝片做準備，他說：「希望可以延到九月先開拍，到時冇咁熱。」而老闆娘上山詩鈉感激好友出席，她說：「多謝鍾鎮濤送上字畫、多謝狄波拉帶我拜四面佛，之後好快搵到舖位。」
文：影視組