陳庭欣遇擲物狂 大銀幕報銷

陳庭欣昨日在微博上載座駕「遇襲」的相片並說：「我塊擋風玻璃冇啦！唉！昨晚在銅鑼灣遇到高空擲物，實在太沒有公德心啦，如果擲到嘅唔係車、係途人咁點算？警察講嗰個位時常發生類似事件，但係暫時未捉到真兇，不過我真係覺得自己好幸運，當時唔喺車廂裏面又或者附近，如果唔係實嚇到彈起，甚至受傷。」

驚係鏹水

「飛來橫禍」的陳庭欣接受電話訪問講到座駕「傷勢」﹖她說：「好彩唔係磚頭，只係入滿水嘅水袋，但唔知係咩液體唔敢掂，驚係鏹水。個擋風玻璃好似蜘蛛網咁裂晒囉，好彩當時行開咗，朋友嘅司機就泊咗係前面，話當時好大聲仲以為撞車，仲有個叉電器擲落嚟，但就打唔中架車，跌咗喺車隔籬。」

車頭擋風玻璃似蜘蛛網般裂開。

陳庭欣昨已將擋風玻璃修理好，但仍嘟嘴心痛座駕遭殃。

報警求助

隨後報警求助的陳庭欣方知原來她泊正「黑點」：「本來泊喺後面一個車位，同我同車嘅梁麗翹落車見前面架車走咗，咁就9秒9速度泊前啲，咁就出事。警察話呢個位有人中過招，但對面冇大廈裝天眼都防唔到，所以依家仍未捉到人，警察話捉到人會通知我，都冇用啦，唔通打佢一身咩？擋風玻璃爛咗就算事小，整咗二千幾蚊。」

陳庭欣隨後再更新微博答謝眾好友包括蔡思貝、翟威廉、黃建東對她的關心，而昨日她其座駕的擋風玻璃已修理好，但因剛整好的關係，庭欣在車窗角位黐了膠布，以防漏水。

文：影視組