徐子淇為金秀賢執房 老公呷醋
「千億新抱」徐子淇原來也中了「星星」毒！昨日出席活動時，她透露早前金秀賢來港出席公開活動，為求見偶像一面，笑言想變身酒店職員為金秀賢打掃，唔怪得老公呷醋啦！
徐子淇昨日於山頂出席慈善步行活動，並負責鳴槍主持起步禮，但她表示不會參與步行，因為晚上與老公李家誠飛往歐洲旅行，慶祝老公前天生日：「原本昨日上機，不過想出席埋今日嘅慈善步行活動，所以一陣要趕返屋企執行李，爹哋、媽咪代我參與。小朋友知道我哋就走，都叫我哋帶埋佢哋去，我叫老公帶埋佢哋，不過佢好忍心話唔好。」她坦言生下兒子後把老公忽略了，希望是次二人世界可作補償。問到送甚麼生日禮物給老公？她表示送Google Glasses：「喺外國見到人哋戴，帶埋去旅行玩吓先。」
眼矇矇似囝囝
繼而她自爆近期愛上韓劇《來自星星的你》男角金秀賢，連老公也呷金秀賢醋！她表示早前金秀賢來港，她很想去見面會，不過認為就算排隊也未必見到：「我知佢住我哋間酒店，我同老公講想去睇佢，叫佢畀套house keeping衫我去打掃等佢，老公話我傻！（老公呷醋？）其實我唔係好追星，好多人話佢靚仔，有朋友話同我囝囝好似，髮型、眼矇矇咁，要用呢個藉口老公先冇咁妒忌！」她解釋喜歡金秀賢不是男女愛情，而是覺得對方似小朋友一樣可愛。她表示最後也沒有見偶像，問到會否感到可惜？她說：「少少，自己都好內疚，當日小朋友放緊復活節假期，我仲想去等！」
文：名人組