古仔父愛嚟料 尋女友生B

古天樂（古仔）、楊千嬅及蔡潔等昨日出席電影《香港仔》主角見面會，席間，眾人又與觀眾大玩遊戲，當看到假扮戲中囡囡的小女孩時，被司儀問到知否對方扮誰？古仔即抵死笑道：「紙紮公仔！」令全場笑爆！古仔事後受訪時大讚飾演其女兒的小演員性格活潑又可愛，更十分為食：「佢一邊拍一邊話未食嘢好餓，我就即刻搵人買畀佢食，點知食完又話好飽想瞓覺。最慘係拍到夜晚，可能到平時瞓覺時間，所以佢拍到好攰，我叫佢唔好玩得太過分，唔係就冇力拍，但佢係冇可能坐得低。」父愛氾濫的古仔又坦言，一直很喜歡小朋友，更不諱言很想生BB：「好在拍戲有好多機會接觸小朋友，所以已經覺得好開心，希望將來會有小朋友。（有計劃生BB？）冇可能用『計劃』兩個字嚟講，我真係唔知道。（搵女友先？）係，我唔可能一個人生BB。」

異口同聲祝福達叔

對於吳孟達（達叔）早前心臟發炎入院，更一度誤傳死訊，古仔祝福達叔早日康復；千嬅則稱未聯絡到對方，但透過導演彭浩翔得悉對方曾入院做手術：「知道佢應該休養中，聽到佢停工嘅消息都幾擔心。（佢唔敢出嚟宣傳？）我覺得健康最重要，最好養好身體先。（拍戲時有不適？）我哋同場得一、兩日，但見佢都幾精神。」

古仔見同場的可愛小男孩即目不轉睛，場面搞笑。

千嬅（左起）、古天樂、蔡潔（右）等昨日對人扮的恐龍相當有興趣。

提到老公丁子高首次為她下廚，千嬅大讚對方廚藝了得：「嗰日佢放假就話試吓煮畀我食，我話依家keep緊fit你先煮，但我都好開心，佢煮啲pasta幾好食。我都想努力學煮嘢，但等我真係變家庭主婦先，依家做楊小姐時間多啲。」

蔡潔籲包容內地人

近年常見內地旅客在港通街大小便，千嬅直言覺得不太衛生，但相信只屬個別事件：「我真係冇見過，希望政府多啲呢方面指引平衡啲 。（囝囝想大便點？）通常喺屋企去晒先，況且去餐廳食飯有廁所，所以唔會有呢啲突發事。」蔡潔則希望大家能多點包容內地人，並謂許多內地人都支持港產片，她又大讚對手曾志偉身材fit：「本來以為佢好多肉地，但其實佢咁嘅年紀算keep得好。」

文：影視組