佘詩曼爆千語外賣送糖水

佘詩曼與林峯昨日於將軍澳為新劇《使徒行者》開工，拍攝一場阿峯營救臥底阿佘戲份，劇組出動80名臨時演員，手持道具刀向車廂中的二人襲擊，期間阿峯一度於車廂開槍還擊，又擁阿佘入懷擋刀。

穿上絨褸的阿佘於酷熱天氣下開工非常辛苦，透露已用退熱貼散熱，談到劇中不乏火燒、爆炸等場面，阿佘笑指幸而不用打：「係阿峯救我，80人打兩個喎！佢有開槍，英雄救美嗰隻，都幾淒美。」阿佘指劇中與阿峯有感情線，亦有kiss戲份，不過全屬輕鬆搞笑，雖然兩人曾傳緋聞，但阿佘坦言二人很專業，不會過分避忌。

劇組出動80名臨時演員持刀襲擊，林峯即擁阿佘入懷。

吳千語

問到阿峯女友吳千語有否前來探班？她謂：「久唔久嚟會買蛋糕、糖水。（兩個好sweet？）一睇就知係雙小情侶。（羨慕？快啲搵個男友！）都有圈外人追，睇定啲先，依家係初步接觸，朋友階段。（靚仔？）冇啲同事咁靚仔，但我覺得心胸廣闊、有智慧、識得照顧我同錫我，一見到佢會笑就得。」

耳鳴五分鐘

阿峯則表示於車廂中，拍開槍戲時忘記塞棉花，結果耳鳴5分鐘。對於被阿佘踢爆女友曾探班，阿峯謂：「都係間唔中，有時外景時間唔複雜，佢就會買啲嘢食畀大家。」更指待完成該劇後便要為演唱會減磅。

文：影視組