高海寧推富豪約會：8位數都唔去！
娛樂圈不時傳出有人出價邀女星出席飯局，就連日前訪港的韓國型男金秀賢都傳出有富婆欲花千萬豪包他來港飯敍。無綫咪神高海寧（高Ling）近日亦收到神秘電話，以7位數邀出席富豪飯局，但都被她拒絕：「8位數都唔會去！」寧願自食其力亦唔搵快錢。前晚高Ling大晒三吋事業線出席活動，遭大批龍友圍住拍照，果然受男士歡迎。
現年28歲的無綫咪神高Ling，自2008年參選港姐後，憑其34D逼爆上圍極速上位，加上她不時在節目中賣大包，性感形象深入民心。近日傳出有富豪睇中高Ling，開價7位數力邀她出席飯局。面對金錢誘惑，高Ling依然沒半點猶豫，接受電話訪問時堅決地稱：「我從來冇出席過，都唔會以呢個方式搵錢，我過唔到自己嗰關，8位數都唔會去！」
依家唔會 將來唔會
高Ling亦坦言早前曾收到電話，直接向她開價，不願透露銀碼的她稱：「收到莫名其妙嘅電話，好直接咁問我有冇興趣（去飯局），我好強硬、好堅決咁拒絕咗，我同佢講我依家唔會去，將來都唔會去，叫佢唔好再打畀我。」問到若有好劇本及大導演向她招手，但需性感、甚至全裸演出會如何選擇？她謂：「到時先算啦！我都唔知，未發生所以冇諗呢個問題。」
高Ling肯搏肯露贏得不少人氣，不過性感女神亦有煩惱。她謂：「除咗尋晚（前晚），我已經好耐冇性感，但係大家都係會覺得我同性感係有關連，其實有少少傷心，但諗諗吓都開心嘅，至少大家冇忘記我。我好想喺戲劇上有突破，但唔係除多件衫就係突破，希望大家睇到我嘅努力啦！」
愛動作片 唔拍傷身
前晚高Ling和莊思敏（Jacquelin）到蘭桂坊出席啤酒活動，高Ling身穿銀色連身裙兼露出三吋事業線，玩遊戲時更俯身「倒奶」疊啤酒罐，噴血程度爆燈！現場所見，高Ling右腳大腿上有明顯刮損疤痕，她說：「拍《使徒行者》要同佘詩曼同陳敏之打交，被高踭鞋整損咗。」她表示喜歡拍動作戲，問到可擔心會損手爛腳？高Ling說：「值得嘅，當學多啲嘢，同埋都幾好玩。」
同場的Jacquelin雖中門大開，但除了不及高Ling搶鏡外，更失策露膠紙，絕對是老貓燒鬚。性格爽朗的Jacquelin自爆愛飲酒，還試過飲到爛醉，在酒吧瞓天光。她又笑言酒品好等於人品好：「試過有朋友飲醉酒打爛晒啲嘢，唔敢再同佢出去，都幾驚唔識控制自己嘅人。」
文：影視組