黃浩然獲男粉絲表白嫌唔夠喉
黃浩然昨為無綫劇集《愛我請留言》宣傳獲男粉絲「表白」，但男粉絲卻害羞只叫浩然加油，浩然笑說：「淨係咁咋﹖」騷靚腰谷宣傳的姚子羚則破例上討論區聽取民意。
黃浩然、姚子羚、關禮傑、傅嘉莉等無綫劇集《愛我請留言》演員昨日到尖沙咀天星碼頭為劇集谷宣傳，吸引大批市民圍觀。遊戲進行時有男粉絲向黃浩然「表白」心底話，但男粉絲上台後卻十分害羞說：「浩然，加油﹗」浩然笑謂：「淨係咁咋？冇其他？」男粉絲續說：「希望你同翠如喺戲裏面一齊。」隨後眾藝員與觀眾合力運棉花糖分享甜蜜，勝出的觀眾分別獲得浩然與子羚「抱抱」及「親親」。
錫Celine親試水溫
劇中飾演浩然與子羚女兒的小演員楊鎧凝（Celine）昨日缺席活動，剛巧有雜誌報道指Celine拍攝一場沖涼戲時幾乎焗暈，浩然表示：「唔係，嗰場戲講我幫佢沖涼，因為錄影廠凍，所以刻意將啲水整熱啲驚Celine凍親，拍之前我都試過水溫，浸咗大概二十分鐘，小朋友浸完塊面有啲紅卜卜啫。」子羚也力撐由監製到眾演員也十分愛錫Celine。
對於收視浩然希望能再進一步，他謂：「套戲係講年輕人嘅愛情觀，年輕人嘅共鳴會大啲，公司都想畀多啲唔同題材等觀眾有新鮮感。」向來沒有上討論區習慣的子羚今次也「破例」上各大討論區聽取觀眾反應，她謂網上討論區對劇集討論熱烈，評價也有讚冇彈，令她十分開心。
文：影視組