Kelly超模側擊V煞Baby靚絕紅氈
陳慧琳昨晚在金像獎紅地氈罕有地施展「側身誘惑」，Angelababy和楊崢同以超性感Deep V迎戰，時裝設計師何國鉦為頒獎禮的最佳衣着獎任評判，最終男、女得主為着紅褲的張家輝及晒胸的Baby，何國鉦又逐一點評紅地氈上的明星。珠寶品牌伯爵有份贊助今次頒獎典禮，當中以湯唯佩戴的鑽飾最昂貴，令現場變得更閃耀奪目！
陳慧琳有自信
評語：好有超模風範！佢身形好靚，條裙好蝦人着，包住個身，detail位喺側邊露肉，有少少肥肉都着唔到，佢呢個高度carry得好靚，本身着黑色行紅氈較蝕底，但佢條裙有啲金色，頭髮又好型好靚，好襯條裙，佢行出嚟好有自信，有超模風範。
楊千嬅贏整體
評語：條裙顏色好sharp，耳目一新，好fresh好夏天，佢個樣唔適合着複雜款，呢身打扮好簡潔同露背，整體好靚。
珠寶：BVLGARI
張家輝玩破格
評語：所有男士唔係黑就白，但佢着紅色褲好sharp，佢得衣着獎時話冇諗過攞呢個獎，但佢行紅氈時好有自信，演繹得好好。
Poyd似女王
評語：泰國變性人Poyd條裙係咁多個女星中最簡潔、最大器，佢身形好靚，露肩大斗篷，好有氣質先carry到，好簡單，佢氣質襯得好好，條裙仲要紅色，本身會「黐地」，但有女王風範！
楊崢夠簡潔
評語：條裙好簡潔，頸鏈好大條係尖形，襯呢條裙好完美，佢夠高，但頭髮有啲亂，可以紮起，畀風吹起就好亂，但佢作為紅地氈司儀，睇身份場合，佢着得恰到好處。
顏卓靈莊重美
評語：條裙剪裁好啱佢着，佢好年輕，條裙露背，青春得嚟又莊重，但唔應該揀busy print嘅裙，新人應該畀人注意個樣先，但條裙個人像圖案太搶，如果着素色會更突出佢個樣。
珠寶：伯爵