洪永城 志翠相投如情未了
由主持旅遊節目到拍劇，螢幕情侶洪永城和黃翠如都形影不離。兩人於新劇首次演情侶，奉旨浪漫冧「女友」。吻過宅男女神翠如BB的他雖稱冇過電，又強調對方不是他杯茶，但他承認與翠如BB非常合拍，大讚對方演戲出色，即使經常合作都不覺厭倦。
蜻蜓點水 似錫親人
我同黃翠如喺《愛我請留言》做一對情侶，仲會有蜻蜓點水嘅吻戲。嗰幕講我哋喺書局入面，我話：「今晚陪你食飯，乖啦。」就錫佢一啖，好sweet，但錫完感覺好似屋企人，好似錫緊妹妹、家姐、媽咪咁好warm。嗰刻我又真係冇乜觸電感覺，可能因為我哋太熟，拍嗰時都冇話尷尬，因為大家都好清楚係做緊戲，其實吻戲都好正常，唔係好大件事。
我哋拍劇同拍旅遊節目個態度好唔同，拍旅遊節目會輕輕鬆鬆玩，拍劇集就會認真討論劇本、劇情，唔會講其他令人分心嘅嘢，以兩個態度對呢兩件事，因為大家知道一笑件事就玩完。今次都有啲火花出現，畀觀眾見到我哋喺旅遊節目以外冇見過嘅一面。而我都見到翠如嘅另一面，原來佢演戲都真係幾叻，佢仲教我好多嘢。旅遊節目就我講，拍戲就佢話事，因為佢經驗多過我，佢會喺劇集入面畀意見，始終我呢方面新啲，好多元素我都需要學習，例如走位、借鏡、技巧上面畀我好多意見。有時我off camara嘻皮笑臉，佢都會叫我專心番，因為一分心就會抽離角色，入唔到嗰場戲嘅感覺。
雖然成日都同翠如合作，但我都唔會覺得厭倦，因為佢個人好有趣，私底下好傻大姐，成日帶好多歡樂畀我哋，佢傻更更有時都幾可愛。不過翠如唔係我嗰type，我鍾意啲比較成熟、識得照顧自己嘅女仔。我唔介意姊弟戀，以前都試過拍咗大半年，差五至十年都冇問題，最緊要溝通到。我覺得年齡唔係問題，呢方面我冇家人嘅掣肘。
浪漫冧女 送日記簿
講番套劇，我個角色好似大男孩咁鍾意玩，比較欠缺責任感，成日應承咗女朋友嘅嘢唔做。呢啲現實中自己都試過，角色性格好似十幾年前嘅我。當時細個冇好好承諾，但依家唔同咗，出嚟做嘢咁多年，好多嘢需要承擔同去學。劇中我對各方面都冇動力、冇目標，一放工就返屋企打機、同朋友出去玩，但現實中嘅我係個比較有目標嘅人，會定個target畀自己幾年內完成。不過，呢個角色對我幾大挑戰，我會嗲女友，唔係一個好man嘅男仔。呢個角色都成為一個警惕，叫自己將來要做個有責任嘅男仔。
記得有場講我激嬲翠如，為咗氹番佢開心，我唱住《天下無雙》接佢返屋企，又幫佢除鞋、着拖鞋，當佢女王咁服侍，斟嘢畀佢飲又送花，成個過程都好浪漫，呢一幕好值得我將來用嚟氹女友。現實中我都未試過咁做，我覺得自己都唔係個好浪漫嘅人，最浪漫都係試過出trip一個月，自己買本簿每日寫篇日記畀佢，返到去就將成本日記送畀佢，話畀佢聽呢三十日做過咩、幾時諗起佢，當時女友收到都好開心、好感動。
志願當差 恨騷肌肉
呢次係我第二次拍劇，都覺得自己進步咗好多，監製都幫咗我好多，每拍一場戲前都畀好多意見，令到我好入戲，出嚟感覺比《單戀雙城》更易投入角色。今次表現，我會畀自己五十分，因為各方面都欠缺好多嘢，例如冇雙眼皮、六舊腹肌、四十二吋胸肌啦，哈哈。講真演戲方面，我覺得自己欠缺好多感情上嘅觸覺，未做演員之前好少留意自己感覺，演員係需要知道點運用自己嘅情緒出嚟，我好需要經驗去培訓呢樣嘢出嚟。依家我都keep住睇好多書，或者問好多同事意見，一有時間就會睇多啲戲、劇集，去活化自己嘅角色。
下套劇我想試吓扮警察，細個我的志願都係想做警察、消防員，咁我就有藉口操幾個月，日日做gym、跑步，要我騷肌肉都冇問題，雖然可能輸畀公司男藝人，哈哈。聽講佢哋用盡身體十年力量去拍《飛虎》，但如果自己有機會都會做。我未試過去到咁終極、咁辛苦。問我鍾意做主持定拍劇？我覺得兩個都有好處，旅遊節目可以帶出活潑、生動一面，演戲又可以用自己方法去演一個角色，所以兩個都好好玩，我真係揀唔到，惟有話我係個貪心嘅人啦！
後記：
猶記得洪永城與翠如在2013年台慶頒獎禮上，獲獎一刻向女方說：「打個茄輪先！」以為他私下亦是嘻嘻哈哈、口水多過浪花，原來係怕醜仔一名。受訪當日，洪永城表現斯文，談吐聲線溫柔，說到愛情話題時更表現腼腆，幸他仍大方分享感情事。當小記要求他簽名時，十歲已遠赴新西蘭留學的洪永城更像個大細路般反問：「簽英文定中文名好呢？」他覺得簽中文名較有氣勢，但表現有點生疏，要重複練習數遍才簽，相當可愛。
口述：洪永城
筆錄：影視組
攝影：沈健程