張家輝埋沒良知魔性爆發
張家輝在林超賢新片飾演極度兇狠、冷血兼無良知的大反派，他笑言演出時很難掌握，因現實中自己太有良知。林超賢點名起用家輝演出，皆因知對方內裏潛在一股很強的魔性！
影帝張家輝繼電影《証人》、《激戰》後，再與林超賢合作英皇電影《魔警》。家輝飾演一名窮凶極惡兼無半點良知的大反派，演技上再見突破。他坦言首次演如此冷血無良知角色：「呢個角色係我電影上未試過咁貫徹性窮凶極惡嘅負面人物，角色一啲憐憫都冇，一啲良知都冇，真係好難做，因為現實中我太有良知！今次觀眾都可以睇一個好新鮮嘅張家輝。」
冇女合作餓過肌
問家輝是否難以抽離角色？他說：「拍攝時當然要投入，情緒當然會受角色影響。日常生活中我會再揣摩，好似揸車途中、朋友聚會，都會諗如果我係角色韓江會點做呢？」問林超賢為何找家輝演出？他笑言：「今次要佢個魔性，我認識佢咁耐知佢潛在嘅魔性好強，所以今次要佢發揮，佢冇可能做唔到角色上需要嘅魔性。」
林超賢電影向來以男人戲為重心，由《証人》、《激戰》到《魔警》均是陽盛陰衰，家輝對此笑言：「我好恨囉！餓過肌咁。早前都同阿Poyd（泰國變性人）合作過一部戲，餓得太耐手軟腳軟，咁都叫有啲粥水，吊下鹽水咁。（下次要求加女演員？）唔可以，咁會影響林超賢風格同用意，同埋影響佢嘅創作，問題會變得好嚴重，嚴重過電影入面過冇女演員。」林超賢笑謂童星李馨巧於《激戰》有重要戲份，已算是零的突破。
髮型：Edmond Fung @ HH.Hair
化妝：蔡彥菁
服裝：Sandro
場地：Liangyi Museum
文：影視組