巫啟賢點名讚G.E.M.心郁鬥靚聲

巫啟賢將在4月2至4日假演藝學院舉行的「Back to Innocent重回巫啟賢演唱會」，今次個唱將會一次過滿足他三個願望，既可滿足唱歌癮外，又可在現場收錄成發燒碟，最重要是能夠回饋一眾歌迷：「我知道好多樂迷一直想近距離聽我唱歌，今次場地個Size好適合，我啲歌迷唔會帶螢光棒、吹BB，平均年齡35-60歲左右，所以唔怕影響我錄音。」

謝絕花巧

由於今次個唱須錄音出碟，所以每唱一句都要諗過度過：「有差池都冇辦法，所以點解要錄三日，我揀最值得留低嘅track落唱片，講真一定會有壓力。」巫老師預告個唱上只會「齋唱」，謝絕一切花巧嘢：「我唔知點解演唱會要搞咁多嘢？可能我花巧唔起，我清楚樂迷對我嘅要求係『感動我』， 而唔係『攪亂我』。你諗吓如果唱《太傻》，我吊威吔，又彈煙花，大家又點會感動？」

加入戰團

提到時下年輕歌手能否效法巫老師一樣搞「發燒級」個唱？他說：「我都搞咗30年先有資格喎，咁樣即係考起佢哋，做呢件事幾時做都得，但係做得好唔好先？會唔會嘥咗呢？」不過他點名大讚近期憑《我是歌手2》而紅爆的G.E.M.：「佢係一個爆發咗嘅歌手，佢搵到自己嘅舞台、方向，好有自己有性格，呢個就係流行歌手必備條件。」

對於有傳《歌手3》正物色兩岸三地的歌手加盟，巫老師直言有意加入戰團：「我會考慮，因為個舞台好有魅力，個樂隊太正，我有種任何嘢都想試嘅心態，如果時間得，我就去玩！」

文：音樂組